ఈ పథకం ప్రస్తుతం అన్ని వర్గాల రైతులకు స్వచ్ఛంద (Voluntary) విధానంలో అందుబాటులో ఉంది. భూమి యజమానులతో పాటు కౌలు రైతులు, పంట భాగస్వామ్య రైతులు (షేర్క్రాపర్లు) కూడా ఈ పథకంలో చేరే అవకాశం కల్పించారు.
పంట విఫలమైతే రైతులపై పడే ఆర్థిక భారాన్ని తగ్గించి, బీమా సంస్థల ద్వారా పరిహారం అందేలా ఈ పథకం రూపొందించారు. రైతులు చెల్లించాల్సిన ప్రీమియం చాలా తక్కువగా ఉండగా, మిగిలిన మొత్తాన్ని కేంద్ర, రాష్ట్ర ప్రభుత్వాలు భరిస్తాయి.
ఖరీఫ్ పంటలు: బీమా మొత్తంలో కేవలం 2%
రబీ పంటలు: బీమా మొత్తంలో 1.5%
వాణిజ్య, ఉద్యాన పంటలు: బీమా మొత్తంలో 5%
విత్తనాలు వేయలేని పరిస్థితుల్లో కూడా రక్షణ
తీవ్రమైన వర్షాభావం, వరదలు లేదా ఇతర ప్రకృతి కారణాల వల్ల రైతులు పంటను విత్తలేని పరిస్థితి ఏర్పడితే, మొత్తం బీమా మొత్తంలో 25 శాతం వరకు పరిహారం పొందే అవకాశం ఉంది.
మెరుపులు, వడగళ్ల వాన, ఆకస్మిక వరదలు, కొండచరియలు విరిగిపడటం, కరువు, విస్తృత స్థాయిలో కీటకాల దాడి వంటి కారణాలతో నిల్వలో ఉన్న పంటకు నష్టం జరిగినా ఈ పథకం కింద పరిహారం అందుతుంది. అలాగే కోత పూర్తైన తర్వాత పొలంలో ఎండబెట్టడానికి ఉంచిన పంటకు 14 రోజుల వరకు తుఫానులు, అసాధారణ వర్షాలు లేదా ఆకస్మిక వర్షాల వల్ల నష్టం జరిగితే కూడా బీమా రక్షణ వర్తిస్తుంది.
పంట నష్టాన్ని వేగంగా, పారదర్శకంగా అంచనా వేయడానికి ఉపగ్రహ చిత్రాలు, రిమోట్ సెన్సింగ్, డ్రోన్లు, స్మార్ట్ఫోన్ ఆధారిత సాంకేతికతను వినియోగిస్తున్నారు. దీంతో క్లెయిమ్ల పరిష్కారం మరింత వేగంగా జరిగే అవకాశం ఉంటుంది.
రాష్ట్ర ప్రభుత్వం ప్రకటించిన (నోటిఫై చేసిన) పంటలను సాగు చేసే భారతీయ రైతులందరూ ఈ పథకానికి అర్హులు. ఇందులో భూమి యజమానులు, కౌలు రైతులు, పంట భాగస్వామ్య రైతులు కూడా చేరవచ్చు.
దరఖాస్తు చేసుకునే రైతులు కింది పత్రాలను సిద్ధంగా ఉంచాలి.
తాజా పాస్పోర్ట్ సైజు ఫోటో
ఆధార్ కార్డు / ఓటర్ ఐడీ / పాన్ కార్డు
చిరునామా ధ్రువీకరణ పత్రం
బ్యాంకు పాస్బుక్ (IFSC, ఖాతా నంబర్తో)
భూ రికార్డులు లేదా భూ స్వాధీనం ధ్రువీకరణ పత్రం
పంట సాగు ధ్రువీకరణ లేదా స్వీయ ప్రకటన
ఆన్లైన్లో ఎలా దరఖాస్తు చేయాలి?
రైతులు సంబంధిత సీజన్ గడువు ముగిసేలోపు దరఖాస్తు చేసుకోవాలి. సాధారణంగా ఖరీఫ్ పంటలకు జూలై 31, రబీ పంటలకు డిసెంబర్ 31 వరకు అవకాశం ఉంటుంది.
అధికారిక PMFBY పోర్టల్లోకి వెళ్లాలి.
Farmer Corner ఎంపికను క్లిక్ చేయాలి.
కొత్త వినియోగదారులు Guest Farmer ద్వారా నమోదు చేసుకోవాలి.
పేరు, మొబైల్ నంబర్, చిరునామా వివరాలతో యూజర్ ప్రొఫైల్ సృష్టించాలి.
OTP ద్వారా లాగిన్ అయి రైతు దరఖాస్తు ఫారమ్ నింపాలి.
రాష్ట్రం, జిల్లా, భూమి వివరాలు, పంట వివరాలు నమోదు చేయాలి.
అవసరమైన పత్రాలను అప్లోడ్ చేయాలి.
వివరాలను పరిశీలించిన తర్వాత ఆన్లైన్ ద్వారా ప్రీమియం చెల్లించి రసీదు డౌన్లోడ్ చేసుకోవాలి.
ఆఫ్లైన్లో కూడా అవకాశం
కిసాన్ క్రెడిట్ కార్డు (KCC) లేదా వ్యవసాయ రుణం ఉన్న రైతులు తమ బ్యాంకు శాఖ ద్వారా ప్రీమియాన్ని ఆటోమేటిక్గా చెల్లించే అవకాశం ఉంది. అలాగే గ్రామాల్లోని కామన్ సర్వీస్ సెంటర్ (CSC)లకు వెళ్లి అవసరమైన పత్రాలు సమర్పించి కూడా దరఖాస్తు చేసుకోవచ్చు.
ప్రకృతి విపత్తు లేదా కీటకాల దాడి వల్ల పంట నష్టం జరిగినట్లయితే 72 గంటల్లోపు సంబంధిత అధికారులకు సమాచారం ఇవ్వాలి. ఇందుకోసం 14447 టోల్ ఫ్రీ హెల్ప్లైన్కు కాల్ చేయవచ్చు లేదా అధికారిక క్రాప్ ఇన్సూరెన్స్ మొబైల్ యాప్ ద్వారా కూడా నష్టాన్ని నమోదు చేయవచ్చు.
తక్కువ ప్రీమియంతో విస్తృత బీమా రక్షణ, ఆధునిక సాంకేతికతతో వేగవంతమైన క్లెయిమ్ పరిష్కారం, ప్రకృతి విపత్తుల సమయంలో ఆర్థిక భరోసా వంటి ప్రయోజనాలతో ప్రధాన మంత్రి ఫసల్ బీమా యోజన రైతులకు కీలక రక్షణ కవచంగా నిలుస్తోంది.
