ఈ వ్యాఖ్యలను జనసేన తీవ్రంగా ఖండించింది. ఏపీ మంత్రి నాదెండ్ల మనోహర్ స్పందిస్తూ.. ఇవన్నీ పచ్చి అబద్ధాలని, పార్టీ పరువు తీసేలా తప్పుడు ప్రచారం చేస్తున్నారని మండిపడ్డారు. జనసేన నేతలు ఇచ్చిన ఫిర్యాదుతో ఏపీలో ఇంద్రపాలెం, బందర్ తాలూకా, సర్పవరం పోలీస్ స్టేషన్లలో నాగేశ్వర్‌తో పాటు 99టీవీ, సాక్షి మీడియా, గ్రేట్ ఆంధ్ర వెబ్ సైట్లపై పలు సెక్షన్ల కింద ఎఫ్ఐఆర్‌లు నమోదయ్యాయి. ఈ క్రమంలోనే నాగేశ్వర్‌ను విచారించేందుకు మే 26న ఏపీ పోలీసుల బృందం ఆయన నివాసానికి చేరుకుంది. దీంతో అప్రమత్తమైన తెలంగాణ పోలీసులు వెంటనే నాగేశ్వర్ ఇంటికి చేరుకుని ఆయనకు భద్రత కల్పించారు. అనంతరం నాగేశ్వర్ నేరుగా తెలంగాణ డీజీపీని కలిసి తనకు, తన కుటుంబానికి రక్షణ కల్పించాలని విజ్ఞప్తి చేశారు.

మరోవైపు ఈ వివాదంపై ఏపీ డిప్యూటీ సీఎం పవన్ కల్యాణ్ తీవ్ర స్థాయిలో మండిపడ్డారు. రాజమండ్రి సభలో ఆయన మాట్లాడుతూ.. “ఇన్నాళ్లూ ఓపిక పట్టాను.. కానీ కొందరు మేధావులు శృతి మించుతున్నారు. జగన్‌ను అరెస్ట్ చేయాలని నేను ఎందుకు అడుగుతాను? ఆ లాజిక్ నాకే అర్థం కాలేదు. చంద్రబాబు జైల్లో ఉన్నప్పుడే నేను చక్రం తిప్పేవాడిని కదా? నాకు మరణం అంటే భయం లేదు.. ఎవరితోనైనా, ఎక్కడైనా తేల్చుకునేందుకు నేను సిద్ధం” అంటూ పరోక్షంగా నాగేశ్వర్ కు గట్టి వార్నింగ్ ఇచ్చారు. ఇలాంటి తప్పుడు ప్రచారాలు చేసే మీడియా సంస్థలపై కూడా జనసేన ఇకపై దాడులు చేస్తుందని తీవ్ర హెచ్చరికలు జారీ చేశారు.