ఈ వీడియో వైరల్ కావడంతో నెటిజన్లు ఎయిర్‌పోర్ట్ యాజమాన్యాన్ని ఏకిపారేశారు. విమానాశ్రయం లోపలికి వీధి కుక్క ఎలా ప్రవేశించగలిగింది? అక్కడ భద్రత, పర్యవేక్షణ లోపించిందా? అంటూ ప్రశ్నల వర్షం కురిపించారు. ఈ వివాదంపై హైదరాబాద్ ఎయిర్‌పోర్ట్ అధికారులు అధికారికంగా స్పందించారు. భవిష్యత్తులో ఇలాంటి సంఘటనలు పునరావృతం కాకుండా కఠిన చర్యలు తీసుకుంటున్నట్లు తెలిపారు.

వీధి కుక్కల నియంత్రణకు అధీకృత సంస్థ అయిన జీహెచ్‌ఎంసీతో కలిసి తాము ప్రత్యేక డ్రైవ్‌లు నిర్వహిస్తున్నామని, జనవరి 2026 నుండి ఇప్పటివరకు ఎయిర్‌పోర్ట్ ప్రాంగణంలో 21 వీధి కుక్కల సమస్యను పరిష్కరించామని వెల్లడించారు. ఎయిర్‌పోర్ట్‌లోని అన్ని ఫుడ్ కోర్టులు, సర్వీస్ ప్రొవైడర్లు విధిగా వ్యర్థాలను మూతలు ఉన్న డబ్బాల్లోనే పారవేయాలని కఠిన నిబంధనలు విధించినట్లు పేర్కొన్నారు. ఇలాంటి సంఘటనలు మళ్లీ జరగకుండా ఉండేందుకు క్షేత్రస్థాయి సిబ్బందిని మరింత అప్రమత్తం చేశామని, ముందస్తు నివారణ చర్యలను చురుగ్గా అమలు చేస్తున్నామని ఎయిర్‌పోర్ట్ యాజమాన్యం స్పష్టం చేసింది.