Last Updated:
తెలుగు సినీ పరిశ్రమలో తనదైన ముద్ర వేసిన ప్రముఖ దర్శకుడు, ప్రయోగాలకు మారుపేరుగా నిలిచిన సింగీతం శ్రీనివాసరావు ఇక లేరు. 94 ఏళ్ల వయసులో ఆయన కన్నుమూశారనే వార్త సినీ వర్గాలను, అభిమానులను తీవ్ర దిగ్భ్రాంతికి గురిచేసింది.
తెలుగు సినీ పరిశ్రమలో తనదైన ముద్ర వేసిన ప్రముఖ దర్శకుడు, ప్రయోగాలకు మారుపేరుగా నిలిచిన సింగీతం శ్రీనివాసరావు ఇక లేరు. 94 ఏళ్ల వయసులో ఆయన కన్నుమూశారనే వార్త సినీ వర్గాలను, అభిమానులను తీవ్ర దిగ్భ్రాంతికి గురిచేసింది. చెన్నైలోని కావేరి హాస్పిటల్‌లో వయోభారంతో ఆయన తుదిశ్వాస విడిచినట్లు సమాచారం. దాదాపు ఆరు దశాబ్దాల సినీ ప్రస్థానంలో ఎన్నో విభిన్నమైన చిత్రాలను ప్రేక్షకులకు అందించిన సింగీతం.. భారతీయ సినిమా చరిత్రలో తనకంటూ ప్రత్యేకమైన స్థానాన్ని సంపాదించుకున్నారు.
1931 సెప్టెంబర్ 21న జన్మించిన సింగీతం శ్రీనివాసరావు దర్శకుడిగానే కాకుండా రచయిత, నిర్మాత, సంగీత దర్శకుడిగానూ తన ప్రతిభను చాటుకున్నారు. తెలుగు, తమిళ, కన్నడ, హిందీ తదితర భాషల్లో పలు చిత్రాలకు దర్శకత్వం వహించారు. సాధారణ కథలను కూడా వినూత్నమైన ఆలోచనలతో తెరపై ఆవిష్కరించడం ఆయన ప్రత్యేకత. ప్రయోగాత్మక చిత్రాలకు పెద్దపీట వేసిన ఆయన.. తెలుగు సినిమాకు ఎన్నో కొత్త ఆలోచనలను పరిచయం చేశారు.
‘పుష్పక విమానం’, ‘ఆదిత్య 369’, ‘భైరవ ద్వీపం’ వంటి ఎన్నో సినిమాలు సింగీతం శ్రీనివాసరావు ప్రతిభకు నిదర్శనంగా నిలిచాయి. కమల్ హాసన్, బాలకృష్ణ వంటి అగ్ర నటులతో ఆయన చేసిన చిత్రాలు ప్రేక్షకుల నుంచి విశేష ఆదరణ పొందాయి. వినోదంతో పాటు కొత్తదనం, సాంకేతిక ప్రయోగాలు, విభిన్నమైన కథనాలను కలిపి సినిమాను రూపొందించడంలో సింగీతం తనకంటూ ఒక ప్రత్యేక శైలిని ఏర్పరచుకున్నారు.
వయసు పెరిగినా ఆయనలోని సినిమా పట్ల ఆసక్తి మాత్రం ఏమాత్రం తగ్గలేదు. 94 ఏళ్ల వయసులోనూ మరోసారి మెగాఫోన్ పట్టుకుని ‘సింగ్ గీతం’ అనే చిత్రానికి దర్శకత్వం వహించారు. ఈ సినిమాను దర్శకుడు నాగ్ అశ్విన్ నిర్మించారు. వైజయంతీ మూవీస్, స్వప్న సినిమా బ్యానర్లపై రూపొందిన ఈ చిత్రం 2026లో ప్రేక్షకుల ముందుకు వచ్చింది.
‘సింగ్ గీతం’తో సింగీతం తన కెరీర్‌లో 61వ చిత్రాన్ని తెరకెక్కించారు. ఈ సినిమా ఆయన ఎన్నో సంవత్సరాలుగా తెరకెక్కించాలని భావించిన ప్రత్యేకమైన ఆలోచనకు రూపంగా నిలిచింది. ప్రతి డైలాగ్ పాట రూపంలో సాగే వినూత్నమైన మ్యూజికల్ ఫాంటసీగా ఈ చిత్రాన్ని రూపొందించారు. 94 ఏళ్ల వయసులోనూ ఆయన ఈ సినిమాను కేవలం 77 షూటింగ్ రోజుల్లో పూర్తి చేయడం సినీ వర్గాలను ఆశ్చర్యపరిచింది.
సింగీతం శ్రీనివాసరావు దర్శకత్వంలో వచ్చిన ‘సింగ్ గీతం’కు విమర్శకుల నుంచి కూడా ప్రశంసలు లభించాయి. ఆయన వయసును పక్కనపెట్టి కొత్త తరహా కథను, వినూత్నమైన ట్రీట్‌మెంట్‌ను తెరపై ఆవిష్కరించిన విధానాన్ని పలువురు ప్రశంసించారు. 94 ఏళ్ల వయసులోనూ తన సృజనాత్మకతకు వయసు అడ్డంకి కాదని ఆయన ఈ చిత్రంతో మరోసారి నిరూపించారు.
దశాబ్దాల పాటు తెలుగు, దక్షిణ భారత సినిమాకు సేవలందించిన సింగీతం.. తన చివరి చిత్రంతోనూ ప్రయోగాత్మక దర్శకుడిగా తన ప్రత్యేకతను చాటుకున్నారు. సినీ పరిశ్రమలో ఎన్నో తరాల దర్శకులు, నటులు, సాంకేతిక నిపుణులకు స్ఫూర్తిగా నిలిచిన ఆయన మరణం భారతీయ సినీ రంగానికి తీరని లోటుగా నిలవనుంది. సింగీతం శ్రీనివాసరావు భౌతికంగా దూరమైనా.. ఆయన తెరకెక్కించిన విలక్షణమైన సినిమాలు, ఆయన ఆలోచనలు, ఆయన సృష్టించిన పాత్రలు ప్రేక్షకుల జ్ఞాపకాల్లో ఎప్పటికీ నిలిచిపోతాయి.
