చిన్మయి కామెంట్స్, నెటిజన్ల విమర్శల నేపథ్యంలో సింగర్ సునీత తాజాగా ఓ వీడియోను విడుదల చేస్తూ తన వ్యాఖ్యలపై వివరణ ఇచ్చారు. ఆమె మాట్లాడుతూ.. “నాపై చిన్మయికి ఎంత గౌరవం ఉందో, ఆమెపై నాకు కూడా అంతే గౌరవం ఉంది. నా మాటలు మిస్ లీడ్ అయ్యే ఛాన్స్ ఉందని మీరు (చిన్మయి) అన్నారు. అయితే ‘నా శరీరం నా ఇష్టం’ అనే పదానికి అర్థమేంటో నాకు స్పష్టంగా తెలుసు. ఒకరి నియంత్రణలో ఉండకపోవడం, మన శరీరంపై మనకే పూర్తి హక్కు, అర్హత, బాధ్యత ఉండటం అని అర్థం. నేను ఒక వ్యక్తిగా పుట్టాను కాబట్టి ఎవరి కంట్రోల్‌లోనూ ఉండకూడదనే కోరుకుంటాను. దీని చుట్టూ రకరకాల సామాజిక అంశాలు ముడిపడి ఉన్నాయని నాకు తెలుసు. నేను ఎందుకు అలా అన్నానంటే.. మనం ఉన్నది అలాంటి సమాజంలో. ఎదుటివారి చూపులు మనల్ని ఇబ్బంది పెట్టేలా ఉన్న సమాజంలో మనం బతుకుతున్నాం కాబట్టి జాగ్రత్తగా ఉండాలని మాత్రమే చెప్పాను” అని సునీత క్లారిటీ ఇచ్చారు.

తాను ఎప్పుడూ తప్పు చేసే వారిని సమర్థించనని సునీత స్పష్టం చేశారు. “ఎవడైనా వచ్చి నా చేయి నా ఇష్టం అంటూ అసభ్యంగా ప్రవర్తిస్తే వెళ్లి వాడి చేతులు విరగ్గొట్టేవాళ్లలో నేను ముందుంటాను. నేనెప్పుడూ తప్పుదోవ పట్టించేలా మాట్లాడటానికి ప్రయత్నించలేదు. దయచేసి ఇంటర్వ్యూ మొత్తం వీడియో చూడండి, అప్పుడు నా ఉద్దేశం ఏంటో పూర్తిగా అర్థమవుతుంది. ఇలాంటి వేధింపులు అనుభవించిన వాళ్లలో నేను కూడా ఉన్నాను. మహిళలపై వేధింపులను, ఇబ్బంది పెట్టే పరిస్థితులను నేనెప్పటికీ అంగీకరించను, నాకు అది ఓకే కాదు” అని సునీత గట్టి కౌంటర్ ఇచ్చారు. మొత్తానికి ఈ వివాదం టాలీవుడ్ వర్గాల్లో, నెట్టింట హాట్ టాపిక్‌ అయింది. మహిళల స్వేచ్ఛ వర్సెస్ సమాజంలో వాస్తవ పరిస్థితులు అనే అంశంపై నెటిజన్లు రెండు వర్గాలుగా విడిపోయి సోషల్ మీడియాలో పెద్ద ఎత్తున చర్చించుకుంటున్నారు.