‘ఎయిర్, స్పేస్, సైబర్’ కాన్ఫరెన్స్‌లో పాల్గొన్న యూఎస్ ఎయిర్‌ఫోర్స్ కార్యదర్శి ట్రాయ్ మింక్ కూడా ఈ ఆయుధాల మోహరింపును ధ్రువీకరించారు. మారుతున్న కాలానికి అనుగుణంగా ఎదురయ్యే సవాళ్లను సమర్థంగా ఎదుర్కొనేందుకు తాము నిరంతరం సిద్ధంగా ఉంటామని ఆయన చెప్పారు. అందుకే శత్రువులను నిలువరించేందుకు స్పేస్ కంట్రోల్ ఆయుధాలను కక్ష్యలో ఉంచినట్లు తెలిపారు. ఆయుధాల సంఖ్య, వాటి రకాలు, అవి కక్ష్యలో ఎక్కడ ఉన్నాయనే వివరాలను ఆయన వెల్లడించనప్పటికీ, ఆధునిక యుద్ధాల్లో అంతరిక్షం కీలక పాత్ర పోషిస్తున్న తరుణంలో అగ్రరాజ్యం చేసిన ఈ బహిరంగ ప్రకటన అంతర్జాతీయంగా తీవ్ర ప్రాధాన్యం సంతరించుకుంది.

వాస్తవానికి ప్రచ్ఛన్న యుద్ధం నాటి నుంచే అంతరిక్ష సైనికీకరణ బీజాలు పడ్డాయి. 1957లో సోవియట్ యూనియన్ ‘స్పుత్నిక్’ ప్రయోగించిన తర్వాత నుంచే ఉపగ్రహాలను కాపాడుకోవడం, ప్రత్యర్థుల ఉపగ్రహాలను నిర్వీర్యం చేయడంపై అమెరికా, రష్యాలు దృష్టి సారించాయి. 1967 నాటి ‘ఔటర్ స్పేస్ ట్రీటీ’ అంతరిక్షంలో భారీ వినాశకర ఆయుధాల (న్యూక్లియర్ వంటివి) మోహరింపును నిషేధించినప్పటికీ, సంప్రదాయ సైనిక వ్యవస్థలపై ఎలాంటి పూర్తి స్థాయి నిషేధం విధించలేదు. ఆనాటి నుంచి నేటి వరకు అమెరికా, రష్యా, చైనాలతో పాటు భారత్ కూడా సైనిక సమాచార వ్యవస్థలు, నిఘా, నావిగేషన్‌కు అత్యంత కీలకమైన ఉపగ్రహాలను లక్ష్యంగా చేసుకోగల వ్యవస్థలను అభివృద్ధి చేశాయి. తాజాగా అమెరికా ప్రకటనతో అంతరిక్షంలో ఆధిపత్య పోరు మరో కీలక మలుపు తిరిగింది.