మదురై మీనాక్షి అమ్మన్ ఆలయ పార్కింగ్ ప్రాంతంలో నిద్రిస్తున్న 17 ఏళ్ల కుబేంద్రన్ అనే బాలుడిని ఐదుగురు వ్యక్తుల ముఠా దారుణంగా హత్య చేసి, శవాన్ని మొదటి అంతస్తు నుంచి కిందకు పడేసింది. గత చిత్తిరై ఉత్సవాల్లో జరిగిన పాత కక్షల వల్లే ఈ హత్య జరిగినట్లు పోలీసులు భావిస్తున్నారు.

కోయంబత్తూరు సమీపంలోని సూలూర్ (కన్నంపాళయం)లో 10 ఏళ్ల చిన్నారిని కిడ్నాప్ చేసి దారుణంగా హత్య చేశారు. ఈ ఘటన మరువక ముందే విల్లుపురం జిల్లాలో మరో బాలికపై లైంగిక దాడి జరిగిందని స్టాలిన్ ఆరోపించారు. సూలూర్ ఘటనలో బాధితురాలి తల్లికి కూడా సరైన సమాచారం ఇవ్వకుండా పోలీసులు హడావుడిగా అంత్యక్రియలు పూర్తి చేశారని ఆయన మండిపడ్డారు.

కోయంబత్తూరులో ఒక యువతి ఇంటిపై పెట్రోల్ బాంబు దాడి జరగడం, అలాగే సీఎం విజయ్ సొంత నియోజకవర్గమైన పెరంబూర్‌లో డ్రగ్స్ బానిసలు పబ్లిక్ ఆస్తులను ధ్వంసం చేయడం వంటి ఘటనలు భయాందోళనలు కలిగిస్తున్నాయన్నారు.

ఈ విషయంలో బీజేపీ (BJP) కూడా సీఎం విజయ్ ప్రభుత్వంపై విరుచుకుపడింది. సీనియర్ బీజేపీ నేత కె. అన్నామలై మాట్లాడుతూ.. తమిళనాడులో డ్రగ్స్ విక్రేతలకు, లైంగిక నేరగాళ్లకు, హంతకులకు పూర్తి స్వేచ్ఛ లభించిందని ఆరోపించారు. రాష్ట్ర బీజేపీ అధ్యక్షుడు నైనార్ నాగేంద్రన్ కూడా దోషులకు కఠిన శిక్షలు పడేలా చేయాలని డిమాండ్ చేశారు.

విపక్షాల నుంచి తీవ్ర విమర్శలు వస్తున్న నేపథ్యంలో ముఖ్యమంత్రి జోసెఫ్ విజయ్ స్పందించారు. మహిళలు, చిన్నారులపై జరిగే నేరాలను ఎంతమాత్రం సహించబోమని, దోషులపై కఠిన చట్టపరమైన చర్యలు తీసుకుంటామని హామీ ఇచ్చారు. సూలూర్ ఘటనను ఆయన “మానవత్వ రహితమైనది, క్షమించరానిది”గా అభివర్ణించారు.