ఈ దర్శన వ్యత్యాసాలను తక్షణం సరిదిద్దాలని బాలాజీ ప్రత్యేక రైల్వే డివిజన్ సాధన సమితి కన్వీనర్ కుప్పాల గిరిధర్ టీటీడీని డిమాండ్ చేశారు. ప్రస్తుతం శ్రీవాణి ట్రస్ట్‌కు రూ.10,500 చెల్లించి టికెట్లు పొందిన భక్తులకు శ్రీవారి ఆలయంలో అత్యంత సమీపమైన ‘కులశేఖర పడి’ వరకు వెళ్లి స్వామిని దర్శించుకునే అదృష్టం కల్పిస్తున్నారు. కానీ, టీటీడీకి ఏకంగా రూ.10 లక్షలు, ఆపై భారీగా విరాళాలు అందించే దాతలకు మాత్రం కేవలం ‘లఘు దర్శనం’ (దూరం నుంచి దర్శనం) కల్పించడం ఏమాత్రం సమంజసం కాదని ఆయన స్పష్టం చేశారు. భారీగా విరాళాలు ఇచ్చే వారికి తగిన ప్రాధాన్యత ఇవ్వాలని ఆయన కోరారు.

భారీ మొత్తంలో విరాళాలు ఇచ్చే దాతలకు తగిన గౌరవం, సముచితమైన దర్శన సౌకర్యాలు కల్పించకపోతే భవిష్యత్తులో దాతల సంఖ్య తగ్గిపోయే ప్రమాదం ఉందని ఆయన హెచ్చరించారు. ఈ సున్నితమైన అంశాన్ని టీటీడీ పాలకమండలి సమగ్రంగా పునఃసమీక్షించాలని విజ్ఞప్తి చేశారు. అన్ని వర్గాల దాతలకు సమానమైన గౌరవం లభించే విధంగా, ఎవరికీ ఎలాంటి అసంతృప్తి కలగకుండా దర్శన విధానంలో వెంటనే మార్పులు తీసుకురావాలని ఆయన డిమాండ్ చేశారు. దాతలందరికీ సమాన న్యాయం జరిగేలా పారదర్శకమైన కొత్త విధానాన్ని అమలు చేస్తే, భక్తుల్లో టీటీడీ పట్ల విశ్వాసం మరింత బలపడుతుందని కుప్పాల గిరిధర్ ఆశాభావం వ్యక్తం చేశారు.