బాంబు పెట్టామన్న వార్త క్షణాల్లో వ్యాపించడంతో హోటల్‌లో బస చేసిన అతిథులు, పనిచేస్తున్న సిబ్బంది ప్రాణభయంతో వణికిపోయారు. ఏ వైపు నుంచి ఎలాంటి ప్రమాదం ముంచుకొస్తుందోనని తీవ్ర ఆందోళన చెందారు. ప్రాణాలు అరచేతిలో పెట్టుకుని సురక్షిత ప్రాంతాలకు పరుగులు తీయడంతో అక్కడ కొద్దిసేపు గందరగోళ వాతావరణం నెలకొంది. సమాచారం అందుకున్న వెంటనే అలిపిరి ఇన్‌చార్జి సీఐ రామకృష్ణ నేతృత్వంలో భారీ పోలీసు బలగాలు హుటాహుటిన ఘటనా స్థలానికి చేరుకున్నాయి. క్షణాల వ్యవధిలో హోటల్ పరిసర ప్రాంతాలను తమ ఆధీనంలోకి తీసుకున్నారు. ఎవరూ లోపలికి వెళ్లకుండా కట్టుదిట్టమైన భద్రతా చర్యలు చేపట్టి పరిస్థితిని అదుపులోకి తెచ్చారు.

ఇటీవల కాలంలో తిరుపతి నగరంలో తరచుగా ఇలాంటి బాంబు బెదిరింపులు వస్తుండటం పట్ల భద్రతా విభాగాలు అత్యంత అప్రమత్తంగా వ్యవహరిస్తున్నాయి. నిత్యం వేలాది మంది భక్తులు వచ్చే ప్రాంతం కావడంతో పోలీసులు ప్రతి చిన్న సమాచారాన్ని సీరియస్‌గా తీసుకుంటున్నారు. ఇలాంటి ఫేక్ కాల్స్ చేసి పోలీసుల సమయాన్ని వృథా చేసే ఆకతాయిలపై కఠిన చర్యలు తప్పవని అధికారులు హెచ్చరించారు.