ఈనాడు కథనం ప్రకారం.. పోలీసుల దర్యాప్తు బృందం ఉదయ్ కృష్ణారెడ్డి నివాసంలో సోదాలు చేయగా.. అక్కడ ల్యాప్‌టాప్, సెల్‌ఫోన్‌తో పాటు ఒక కత్తి, ఇద్దరు వేర్వేరు వ్యక్తుల చేతిరాతలతో ఉన్న రెండు ప్రేమలేఖలు లభ్యమయ్యాయి. ఆ ప్రేమలేఖలపై ఉన్న పేర్ల ఆధారంగా దర్యాప్తు చేపట్టిన అధికారులకు ఓ ఆసక్తికరమైన నిజం వెలుగులోకి వచ్చింది. ఉదయ్ కృష్ణారెడ్డికి ఆంధ్రప్రదేశ్‌కు చెందిన మరో మహిళతో కూడా సన్నిహిత సంబంధాలు ఉన్నట్లు బయటపడింది.

అశోక్‌నగర్‌లో నివాసముంటున్న ఆ మహిళను ఈ ఏడాది ఫిబ్రవరిలో కేసు నమోదు చేసిన మహిళా ట్రైనీ ఐపీఎస్ కలిసినట్లు విచారణలో తేలింది. ఆ సమయంలో సదరు మహిళ ఉదయ్ కృష్ణారెడ్డి యొక్క విపరీత ప్రవర్తన, తనపై జరిగిన దాడి గురించి ట్రైనీ ఐపీఎస్‌తో బాధను పంచుకున్నారు. ఉదయ్ కోప స్వభావం తెలుసుకున్న ఆ మహిళ అప్పటి నుంచి అతడికి పూర్తిగా దూరంగా ఉంటున్నట్లు పోలీసులు గుర్తించారు.

ఈ సంచలన కేసులో సమగ్ర వివరాలు సేకరించేందుకు పోలీసులు ఇప్పటికే సుమారు 20 మంది నుంచి అధికారిక వాంగ్మూలాలను సేకరించినట్లు సమాచారం. దర్యాప్తును మరింత వేగవంతం చేసేందుకు, లభించిన ల్యాప్‌టాప్, ఫోన్‌లలోని సమాచారాన్ని విశ్లేషించేందుకు నిందితుడైన ఉదయ్ కృష్ణారెడ్డిని పోలీసు కస్టడీకి తీసుకునేందుకు అధికారులు ఏర్పాట్లు చేస్తున్నారు. కస్టడీ విచారణలో మరిన్ని సంచలన విషయాలు బయటకు వచ్చే అవకాశం ఉందనే చర్చ నగర పోలీస్ వర్గాల్లో నడుస్తోంది.