ఈ గందరగోళం సర్దుమణిగిన తర్వాత, అందరి దృష్టి 15 ఏళ్ల యువ సంచలనం వైభవ్ సూర్యవంశీపైనే నిలిచింది. సీనియర్ జాతీయ జట్టుతో తన కెరీర్‌లో మొట్టమొదటి నెట్ సెషన్‌లో పాల్గొన్న వైభవ్, తనపై ఉన్న భారీ అంచనాల ఒత్తిడిని ఏమాత్రం దరిచేరనివ్వలేదు. ఎడమచేతి వాటం కలిగిన ఈ కుర్రాడు నెట్స్‌లో అత్యంత ఆత్మవిశ్వాసంతో బ్యాటింగ్ చేస్తూ, మైదానం నలుమూలలా క్లాసిక్ డ్రైవ్‌లు, తన మార్క్ అటాకింగ్ షాట్లతో అలరించాడు. పిచ్‌పై బౌన్స్ హెచ్చుతగ్గులుగా ఉన్నప్పటికీ సూర్యవంశీ సులువుగా సిక్సర్లు బాదడం విశేషం.

సాధారణంగా క్రికెట్ హడావుడి పెద్దగా లేని బెల్ఫాస్ట్ నగరంలో వైభవ్ రాకతో ఒక్కసారిగా సందడి నెలకొంది. భారత సంతతికి చెందిన ప్రవాస భారతీయులు (NRIs) పెద్ద సంఖ్యలో స్టేడియానికి తరలివచ్చారు. నెట్స్ ముగిసిన తర్వాత వైభవ్‌తో సెల్ఫీలు, ఆటోగ్రాఫ్‌ల కోసం అభిమానులు ఎగబడ్డారు. రాజస్థాన్ రాయల్స్ ఫ్రాంచైజీ వైభవ్‌కు సంరక్షకుడిగా (Guardian) నియమించిన రోమి భిందర్‌తో పాటు, వైభవ్ తల్లిదండ్రులు కూడా ఈ పర్యటనలో జట్టుతో పాటే ఉన్నారు. సరికొత్త టీ20 శకంలో అడుగుపెడుతున్న భారత్, ఈ మ్యాచ్‌లో వైభవ్‌కు తుది జట్టులో అవకాశం ఇచ్చి చరిత్ర సృష్టిస్తుందా.. లేదా ఇషాన్ కిషన్, సంజూ శాంసన్ వంటి సీనియర్లతోనే బరిలోకి దిగుతుందా అనేది కొన్ని గంటల్లో తేలనుంది.