పురుషోత్తమపురిలో ఉన్న వాసుదేవ ఆలయ చైర్మన్ శర్మ(దువ్వాసి మోహన్)ని హీరా బంధు(మైమ్ గోపి) చంపేయడం, ఆపై చైర్మన్ ఎన్నికల్లో తన తండ్రిని గెలిపించుకోవడం జరుగుతుంది. ఆ తర్వాత ఊరిలో జరిగే వాసుదేవుని ఉత్సవాలకు హైదరాబాద్ లో నుంచి కృశవ్(మహేంద్రన్) వస్తాడు. హీరా బంధు మేనకోడలు భువి(అంబికా వాణి) కూడా ఈ ఉత్సవాలకు వస్తుంది. అలా భువి- కృశవ్ చూపులు కలిసి ఇద్దరూ ప్రేమలో పడతారు.

కథ పురుషోత్తమపురి అనే గ్రామంలో మొదలవుతుంది. ఆలయంపై ఆధిపత్యం కోసం విలన్ హీరాబందు చేసే అరాచకాలు, మరోవైపు హీరో హీరోయిన్ల పరిచయం, రొటీన్ ప్రేమకథతో ఫస్టాఫ్ కాస్త నెమ్మదిగా సాగినా.. క్రమంగా కథలోని తీసుకెళ్తారు. ఇంటర్వెల్ బ్లాక్ లో హీరో జైలు నుంచి తప్పించుకోవడంతో సెకండాఫ్ పై ఆసక్తి పెరుగుతుంది. సెకండాఫ్ లో వచ్చే ఫ్లాష్ బ్యాక్ ఎపిసోడ్, అందులో హీరో, అక్కల మధ్య సెంటిమెంట్ బాగా పండింది. కానీ, ఆ తర్వాత మొదలయ్యే అసలైన ‘ట్రెజర్ హంట్’ (నిధి అన్వేషణ) స్క్రీన్ ప్లేను దర్శకుడు సరిగ్గా రాసుకోలేకపోయాడు. దేవుడు, గరుత్మంతుడు, పాములు వచ్చి విలన్లను చంపేయడం, హీరోను కాపాడటం వంటివి ఎలాంటి క్లారిటీ, ఎమోషనల్ కనెక్షన్ లేకుండా సింపుల్ గా తేల్చేశారు. ప్రీ-క్లైమాక్స్ లో అసలు విలన్ ఎవరనే ట్విస్ట్ బాగుంది. చివరలో ఆర్టిఫిషియల్ ఇంటెలిజెన్స్ (AI) గరుత్మంతుడి విజువల్స్ వాడటం కొసమెరుపు. దీనికి తోడు పార్ట్ 2 కి కూడా లీడ్ ఇవ్వడం గమనార్హం.

మాస్టర్ మహేంద్రన్ నటన బాగుంది. హీరోగా స్క్రీన్ ప్రెజెన్స్ పరంగా ఓకే అనిపించాడు. అంబికా వాణి తన పాత్రకు న్యాయం చేసింది. నెగిటివ్ షేడ్స్ లో జాన్ విజయ్, మైమ్ గోపిల నటన సినిమాకు ప్లస్ అయ్యింది. టార్జాన్, తులసి, రాజీవ్ కనకాల, ఆటో రామ్ ప్రసాద్ తదితరులు తమ పరిధి మేర నటించారు. తక్కువ బడ్జెట్ తో తీసినా సాంకేతికంగా ఫర్వాలేదనిపించింది. బ్యాక్ గ్రౌండ్ స్కోర్ తో పాటు ఎడిటింగ్ బాగున్నాయి. కాకపోతే కొన్ని విజువల్స్ రిపీట్ గా చూపించడం ప్రేక్షకులకు కొంతమేర బోర్ కొట్టేంచే అంశం. పూరి జగన్నాథ్ ఆలయం, బ్రహ్మపదార్థం అనే అద్భుతమైన పాయింట్ ను ఎంచుకొని దానిని ఓ గ్రిప్పింగ్ థ్రిల్లర్ గా తెరకెక్కించడంలో దర్శకుడు సక్సెస్ అయ్యాడు. స్క్రీన్ ప్లే ఇంకాస్త మెరుగ్గా ఉంటే వసుదేవసుతం ఇంకా అద్భుతంగా ఉండేది.