మరోవైపు, సురుటుపల్లి పల్లికొండేశ్వరస్వామి దేవాలయ బోర్డు సభ్యుడిగా బాధ్యతలు నిర్వహిస్తున్న వ్యక్తే ఇటువంటి వివాదాస్పద కార్యక్రమంలో పాల్గొనడం మరింత ఆందోళన కలిగించే అంశమని భక్తులు పేర్కొంటున్నారు. దేవాలయాల పట్ల మరింత బాధ్యతాయుతంగా వ్యవహరించాల్సిన పదవిలో ఉన్న వ్యక్తి నుంచి ఇలాంటి చర్యలు రావడం వల్ల సమాజానికి తప్పు సంకేతాలు వెళ్తాయని వారు అంటున్నారు. ఆలయాల పవిత్రతను కాపాడడం ప్రతి ఒక్కరి బాధ్యత అని, ప్రజాప్రతినిధులు, దేవాలయ బోర్డు సభ్యులు ఆదర్శంగా నిలవాల్సిన అవసరం ఉందని అభిప్రాయపడుతున్నారు.

ఈ ఘటనను టీటీడీ అత్యంత సీరియస్‌గా తీసుకుంది. టీటీడీ విజిలెన్స్ అధికారుల ఫిర్యాదు మేరకు పోలీసులు కేసు నమోదు చేయగా, ఘటన సమయంలో అప్రమత్తంగా వ్యవహరించని సంబంధిత ఆలయ సిబ్బందిపై శాఖాపరమైన చర్యలు తీసుకోవాలని ఆదేశాలు జారీ చేసింది. ఆలయ ప్రతిష్టకు భంగం కలిగించే లేదా భక్తుల మనోభావాలను దెబ్బతీసే ఇలాంటి చర్యలను ఎట్టి పరిస్థితుల్లోనూ ఉపేక్షించబోమని టీటీడీ స్పష్టం చేసింది. పవిత్ర ఆలయాల్లో నిబంధనలకు విరుద్ధంగా వ్యవహరించే వారిపై చట్టబద్ధంగా కఠిన చర్యలు తీసుకుంటామని, భవిష్యత్తులో ఇలాంటి ఘటనలు పునరావృతం కాకుండా అన్ని ఆలయాల్లో పర్యవేక్షణను మరింత కట్టుదిట్టం చేయనున్నట్లు టీటీడీ వర్గాలు వెల్లడించాయి.