Last Updated:
మగాళ్లు మాత్రమే చేసే పనిలో అదరగొడుతున్న ముస్లిం మహిళ.. ఆ ఒక్క కారణం తెలిస్తే సెల్యూట్ చేస్తారు!
సోషల్ మీడియాలో ప్రతిరోజూ ఎన్నో రకాల వీడియోలు మన కంట పడుతుంటాయి. అందులో కొన్ని మనల్ని నవ్విస్తే, కొన్ని తీవ్రంగా ఆలోచింపజేస్తాయి. తాజాగా హైదరాబాద్ నగరంలో ఓ యువతి షేర్ చేసిన ‘డే ఇన్ మై లైఫ్’ వీడియో నెట్టింట విపరీతంగా వైరల్ అవుతోంది. సాధారణంగా డెలివరీ బాయ్స్ మాత్రమే కనిపించే వృత్తిలో, ఒక మహిళ అడుగుపెట్టడమే గొప్ప విషయం. అందులోనూ సంప్రదాయబద్ధంగా బురఖా ధరించి, ముఖానికి నిఖాబ్ కట్టుకున్న ఆ యువతి ర్యాపిడో పార్శిల్ డెలివరీ గర్ల్గా పనిచేస్తుండటం నెటిజన్ల హృదయాలను బలంగా తాకింది. సమాజంలో ఏళ్లుగా పాతుకుపోయిన మూస పద్ధతులను బద్దలు కొడుతూ ఆమె ఎంతోమందికి ఆదర్శంగా నిలిచింది. తన ఉన్నత చదువుల కోసం, ఆర్థిక స్వాతంత్ర్యం కోసం ఆమె ఎంచుకున్న ఈ కష్టమైన మార్గం ఇప్పుడు అందరికీ గొప్ప స్ఫూర్తిదాయకంగా మారింది.
యాస్మిన్ షేక్ అనే ఈ ఆత్మవిశ్వాసం గల యువతి ఇన్స్టాగ్రామ్ వేదికగా తన దైనందిన జీవితాన్ని అందరితో పంచుకుంది. ర్యాపిడో డెలివరీ ఏజెంట్గా తన రెండో రోజు పనికి సంబంధించిన అనుభవాలను ఆ వీడియోలో స్పష్టంగా చూపించింది. బురఖా, నిఖాబ్ ధరించి, భుజానికి క్రాస్ బాడీ బ్యాగ్ వేసుకుని ఆమె ఎంతో ఉత్సాహంగా పనికి బయలుదేరిన తీరు ప్రతి ఒక్కరినీ ఆకట్టుకుంది. హైదరాబాద్, సికింద్రాబాద్ జంట నగరాల్లో రోజంతా ట్రాఫిక్లో కష్టపడి ఆమె ఐదు పార్శిళ్లను విజయవంతంగా డెలివరీ చేసింది. ఆ రోజు ఉదయం నుంచి సాయంత్రం వరకు ఆమెకు దక్కిన సంపాదన కేవలం 231 రూపాయలే అయినా.. ఆ చిన్న మొత్తం భవిష్యత్తులో తన పెద్ద లక్ష్యాల సాధనకు ఎంతో సాయపడుతోందని సంతోషంగా చెబుతోంది.
కేవలం ఈ చిన్న వీడియో చూసి తన జీవితాన్ని తప్పుగా అంచనా వేయొద్దని యాస్మిన్ కామెంట్స్ రూపంలో నెటిజన్లను సున్నితంగా కోరింది. ఆమె జీవితంలో బయటి ప్రపంచానికి తెలియని ఎన్నో కష్టాలు, కన్నీళ్లు దాగి ఉన్నాయి. సొంత కాళ్లపై నిలబడాలన్నది అతిపెద్ద కల. దురదృష్టవశాత్తు యాస్మిన్ తండ్రి, సోదరుడు గతంలోనే చనిపోయారు. అప్పటినుంచి ఇంట్లో దిక్కులేని పరిస్థితి ఏర్పడింది. ఆ సమయంలో ఆమె తల్లి, నానమ్మ ఎంతో కష్టపడి రోజువారీ కూలి పనులు చేస్తూ యాస్మిన్తో పాటు మరో ఇద్దరు ఆడపిల్లలను సాకారు. వారికి మంచి విద్యాబుద్ధులు నేర్పించి, పెళ్లిళ్లు కూడా చేశారు. ఆ కష్టాన్ని దగ్గరుండి చూసిన యాస్మిన్.. తన కాళ్లపై తాను నిలబడాలని దృఢంగా నిర్ణయించుకుంది.
ప్రస్తుతం కుటుంబంలో డబ్బు సంపాదించేవారు ఎవరూ లేకపోవడంతో తన తల్లికి, నానమ్మకు తాను భారం కాకూడదని ఆమె బలంగా భావిస్తోంది. నిజాయితీగా కష్టపడి డబ్బు సంపాదించాలనే పవిత్రమైన ఉద్దేశంతోనే ఈ ర్యాపిడో డెలివరీ జాబ్ ఎంచుకున్నట్లు ఆమె స్పష్టం చేసింది. కేవలం సోషల్ మీడియాలో పాపులారిటీ కోసమో, లైక్స్ కోసమో తాను ఈ పని చేయడం లేదంటూ విమర్శకులకు చెక్ పెట్టింది. ఈ పని ద్వారా వచ్చే డబ్బుతో తన డిగ్రీ, బీఈడీ (B.Ed) చదువులను పూర్తి చేసి, భవిష్యత్తులో స్థిరమైన కెరీర్ నిర్మించుకుంటానని ఆత్మవిశ్వాసం వ్యక్తం చేసింది. తను కష్టపడి సంపాదించిన సొంత డబ్బుతో తన తల్లిని, నానమ్మను పవిత్ర ఉమ్రా యాత్రకు పంపించాలన్నదే తన జీవిత ఆశయమని ఎంతో గర్వంగా తెలిపింది.
ఇంటి బాధ్యతలు, చదువు, కష్టమైన పని.. ఇలా అన్నింటినీ సమర్థవంతంగా బ్యాలెన్స్ చేస్తున్న యాస్మిన్ అంకితభావానికి సోషల్ మీడియాలో నెటిజన్లు సెల్యూట్ చేస్తున్నారు. ఆమె పెట్టిన వీడియోపై ప్రశంసల జల్లు కురిపిస్తున్నారు. “నువ్వు నిజంగా చాలా ధైర్యవంతురాలివి, నెగెటివిటీని అస్సలు పట్టించుకోకు” అని కొందరు కామెంట్లు పెడుతున్నారు. “ఆత్మగౌరవం, స్వతంత్రంగా జీవించడం కన్నా ఈ లోకంలో ముఖ్యమైనది మరొకటి లేదు, కీప్ ఇట్ అప్” అని ఇంకొందరు ప్రోత్సహిస్తున్నారు. “మహిళలు తలుచుకుంటే దేన్నయినా సాధించగలరు, నీ కలలు నెరవేరాలి” అంటూ ఆశీర్వదిస్తున్నారు. కష్టాలను ఎదుర్కొంటూ ధైర్యంగా ముందుకు సాగుతున్న యాస్మిన్కు సోషల్ మీడియా వేదికగా దేశవ్యాప్తంగా సానుకూల స్పందన, మద్దతు భారీ స్థాయిలో వెల్లువెత్తుతోంది.
Hyderabad,Telangana
