చంద్రుడిపై 4G నెట్వర్క్ ప్రయోగం
గత ఏడాది మార్చిలో నోకియా మరియు ఇంట్యూయిటివ్ మెషీన్స్ సంస్థలకు చెందిన అథీనా (Athena) ల్యాండర్ చంద్రుడి దక్షిణ ధృవ ప్రాంతంలో దిగింది. ఈ ల్యాండర్తో పాటు ప్రత్యేకంగా రూపొందించిన 4G/LTE మొబైల్ నెట్వర్క్ వ్యవస్థను కూడా తీసుకెళ్లారు.
ల్యాండర్ విజయవంతంగా దిగిన తర్వాత నెట్వర్క్ యాక్టివేట్ అయి భూమిపై ఉన్న కంట్రోల్ సెంటర్తో కనెక్ట్ అయ్యింది. నోకియా ప్రకారం, నెట్వర్క్లోని ప్రధాన భాగాలు అయిన రేడియో యూనిట్, నెట్వర్క్ కోర్ సక్రమంగా పనిచేశాయి. అంతేకాకుండా చంద్రుడి నుంచి భూమికి కొంత డేటాను కూడా పంపగలిగాయి.
అయితే ఈ ప్రయోగం పూర్తిస్థాయిలో విజయవంతం కాలేదు. సౌర ప్యానెల్లకు తగినంత సూర్యకాంతి అందకపోవడంతో వ్యవస్థ కేవలం 25 నిమిషాల పాటు మాత్రమే పనిచేసింది. అందువల్ల చంద్రుడి నుంచి భూమికి ప్రత్యక్ష కాల్ చేయడం సాధ్యపడలేదు.
నోకియా బెల్ ల్యాబ్స్ స్పేస్ కమ్యూనికేషన్స్ నిర్వహించిన ఈ ప్రయోగం ద్వారా మొబైల్ నెట్వర్క్లు అంతరిక్షంలో కూడా పనిచేయగలవని నిరూపితమైంది. భవిష్యత్తులో చంద్రుడిపై శాశ్వత స్థావరాలు ఏర్పాటుచేస్తే ఈ సాంకేతికత కీలక పాత్ర పోషించనుంది.
ప్రస్తుతం అమెరికా అంతరిక్ష సంస్థ నాసా (NASA) చేపడుతున్న ఆర్టెమిస్ (Artemis) కార్యక్రమం ద్వారా మళ్లీ మనుషులను చంద్రుడిపైకి పంపి, అక్కడ దీర్ఘకాలిక మానవ ఉనికిని ఏర్పాటు చేయాలని లక్ష్యంగా పెట్టుకుంది. ఇందుకోసం వ్యోమగాముల స్పేస్ సూట్లు, రోవర్లు, బేస్ స్టేషన్లు అన్నీ ఒకే కమ్యూనికేషన్ నెట్వర్క్తో అనుసంధానం కావాల్సిన అవసరం ఉంది.
చంద్రుడిపై పనిచేసే మొబైల్ కమ్యూనికేషన్ వ్యవస్థను మరింత అభివృద్ధి చేసేందుకు నాసా, నోకియా కలిసి పని చేస్తున్నాయి. ఈ సాంకేతికత ద్వారా వ్యోమగాములు ఒకరితో ఒకరు మాట్లాడుకోవడం, హెచ్డీ వీడియోలు పంపించడం, మిషన్ కంట్రోల్తో నిరంతరం సంబంధాలు కొనసాగించడం సాధ్యమవుతుంది.
అలాగే చంద్రుడిపై ఒకేసారి పనిచేసే అనేక రోబోట్లు, రోవర్లు, శాస్త్రీయ పరికరాలను ఒకే నెట్వర్క్ ద్వారా నియంత్రించవచ్చు. అవి సేకరించే సమాచారాన్ని రియల్టైమ్లో భూమికి పంపే అవకాశం కూడా ఉంటుంది.
ప్రస్తుతం చంద్రుడికి పంపే రోవర్లు, ల్యాండర్లు నేరుగా రేడియో ఫ్రీక్వెన్సీల ద్వారా భూమితో కమ్యూనికేట్ చేస్తున్నాయి. కానీ భవిష్యత్తులో చంద్ర మిషన్ల సంఖ్య పెరిగే కొద్దీ ఈ పద్ధతి సరిపోదు.
చంద్రుడిపై ఎక్కువకాలం మనుషులు నివసించే పరిస్థితి వస్తే, అక్కడి కార్యకలాపాలను సమన్వయం చేయడానికి అధునాతన కమ్యూనికేషన్ వ్యవస్థ తప్పనిసరి అవుతుంది. మొబైల్ నెట్వర్క్ ద్వారా వ్యోమగాములు, రోవర్లు, పరిశోధనా కేంద్రాలు అన్నీ ఒకే ప్లాట్ఫారమ్లో అనుసంధానమవుతాయి.
చంద్రుడిపై మొబైల్ నెట్వర్క్ ఏర్పాటు చేయడం అంత సులభం కాదు. అక్కడ ఉష్ణోగ్రతలు తీవ్రంగా మారుతుంటాయి. పగటి సమయంలో సుమారు 120 డిగ్రీల సెల్సియస్ వరకు పెరగగా, రాత్రి వేళల్లో మైనస్ 170 డిగ్రీల సెల్సియస్ వరకు పడిపోతాయి.
అదనంగా చంద్రుడిపై భారీ స్థాయిలో ధూళి, రేడియేషన్ ఉంటుంది. ఇవి ఎలక్ట్రానిక్ పరికరాలకు నష్టం కలిగించే ప్రమాదం ఉంది. అంతేకాదు అక్కడ విద్యుత్ సరఫరా లేకపోవడంతో పరికరాలు పూర్తిగా సౌరశక్తిపైనే ఆధారపడాలి.
అందుకే భూమిపై ఉపయోగించే సాధారణ మొబైల్ టవర్లు అక్కడ పనిచేయవు. చంద్రుడి ప్రత్యేక పరిస్థితులకు అనుగుణంగా రూపొందించిన కమ్యూనికేషన్ వ్యవస్థలే ఉపయోగించాల్సి ఉంటుంది.
ఈ సవాళ్లు ఉన్నప్పటికీ, చంద్రుడిపై మొబైల్ నెట్వర్క్ ప్రయోగం భవిష్యత్తులో అంతరిక్ష కమ్యూనికేషన్ వ్యవస్థలను పూర్తిగా మార్చే దిశగా ఒక పెద్ద అడుగుగా శాస్త్రవేత్తలు భావిస్తున్నారు.
