దర్శనం అనంతరం రంగనాయకుల మండపంలో వేదపండితులు ఆయనకు వేదాశీర్వచనం అందించగా, టీటీడీ ఈవో ఎం. రవిచంద్ర స్వామివారి తీర్థప్రసాదాలు, చిత్రపటాన్ని అందజేశారు. అనంతరం మీడియాతో మాట్లాడిన కేంద్ర మంత్రి, తిరుమలలో భక్తులకు మరింత మెరుగైన సేవలు అందించేందుకు టీటీడీ చేపట్టిన సాంకేతిక విప్లవాన్ని ప్రశంసించారు.

ప్రత్యేకంగా వైకుంఠం క్యూ కాంప్లెక్స్‌లో ఏర్పాటు చేసిన ఇంటిగ్రేటెడ్ కమాండ్ అండ్ కంట్రోల్ సెంటర్ (ఐసీసీసీ) పనితీరు తనను ఎంతో ఆకట్టుకుందని చెప్పారు. కృత్రిమ మేధస్సు ఆధారిత ఈ వ్యవస్థ ద్వారా భక్తుల రద్దీ, దర్శన క్యూ లైన్ల పరిస్థితి, వసతి గదుల లభ్యత, లడ్డూ ప్రసాదాల పంపిణీ వంటి కీలక అంశాలను క్షణక్షణం పర్యవేక్షించడం సాధ్యమవుతోందని పేర్కొన్నారు.

భక్తుల సంఖ్య, వివిధ కంపార్ట్మెంట్లలో వేచి ఉన్న వారి వివరాలు, గంటల వారీగా రద్దీ పరిస్థితులు, వసతి సౌకర్యాల సమాచారం వంటి అంశాలు వెంటనే అందుబాటులోకి రావడం వల్ల సేవల నిర్వహణ మరింత సమర్థవంతంగా మారిందని తెలిపారు. ఆధునిక సాంకేతికతను ప్రజా సేవల కోసం వినియోగించడంలో టీటీడీ దేశానికి ఆదర్శంగా నిలుస్తోందని కొనియాడారు.

రాష్ట్ర ముఖ్యమంత్రి నారా చంద్రబాబు నాయుడు, ఐటీ శాఖ మంత్రి నారా లోకేష్ సాంకేతిక రంగ అభివృద్ధికి ప్రాధాన్యత ఇస్తూ రాష్ట్ర పురోగతికి కృషి చేస్తున్నారని ప్రశంసించిన ఆయన, ఈ ప్రాజెక్టు విజయవంతం కావడంలో సహకరించిన ప్రవాస భారతీయ భక్తులకు ప్రత్యేక కృతజ్ఞతలు తెలిపారు. కేవలం 100 రోజుల వ్యవధిలోనే ఏఐ ఆధారిత సేవల వ్యవస్థను అందుబాటులోకి తీసుకురావడం విశేషమని టీటీడీ అధికారులను అభినందించారు.

ప్రపంచ పర్యావరణ దినోత్సవం సందర్భంగా నిర్వహించిన ఏక్ పేడ్ మా కే నామ్ కార్యక్రమంలో పాల్గొన్న పీయూష్ గోయల్, తిరుమలలో తన తల్లి పేరుతో మొక్కను నాటడం ఎంతో ఆనందంగా ఉందని చెప్పారు. పర్యావరణ పరిరక్షణ ప్రతి ఒక్కరి బాధ్యత అని పేర్కొంటూ, ప్రతి చిన్నారి తమ తల్లి పేరుతో ఒక మొక్కను నాటి జీవితాంతం దానిని సంరక్షించేలా ప్రోత్సహించాలని పిలుపునిచ్చారు.

ప్రధానమంత్రి నరేంద్ర మోదీ ప్రారంభించిన ఈ కార్యక్రమం దేశవ్యాప్తంగా పచ్చదనాన్ని పెంపొందించడమే కాకుండా పర్యావరణంపై అవగాహన పెంచడంలో కీలక పాత్ర పోషిస్తుందని ఆయన ఆశాభావం వ్యక్తం చేశారు. ప్రతి సంవత్సరం జూన్ మొదటి వారంలో తన జన్మదినం సందర్భంగా తిరుమలను సందర్శించి శ్రీవారి ఆశీస్సులు పొందడం తనకు ఆనవాయితీగా మారిందని పీయూష్ గోయల్ తెలిపారు. దేశ సేవకు, ప్రజల సంక్షేమానికి మరింత కృషి చేసే శక్తిని ప్రసాదించాలని శ్రీవారిని ప్రార్థించినట్లు చెప్పారు. ఆధ్యాత్మికతకు కేంద్రబిందువైన తిరుమలలో ఒకవైపు అత్యాధునిక ఏఐ సేవలను పరిశీలిస్తూ, మరోవైపు తల్లి పేరుతో మొక్కను నాటి పర్యావరణ పరిరక్షణకు సందేశం ఇవ్వడం ద్వారా కేంద్ర మంత్రి పీయూష్ గోయల్ అందరి దృష్టిని ఆకర్షించారు.