మధ్యప్రదేశ్ రాష్ట్రంలో స్థిరపడిన డాక్టర్ యోగి సిద్ధార్థ్ (జగపతి బాబు), తన భార్య ప్రియ (లయ), పిల్లలతో కలిసి ఎంతో ప్రశాంతంగా, సంతోషంగా జీవిస్తుంటాడు. వైద్య వృత్తిలో ఉంటూనే కుటుంబానికి పెద్ద పీట వేసే యోగి జీవితం సాఫీగా సాగిపోతుంటుంది. అయితే అంతా సజావుగా సాగుతున్న వీరి జీవితంలోకి ఒక అనుకోని ప్రమాదం ద్వారా అముద (హ్రితిక శ్రీనివాస్) అనే యువతి ప్రవేశిస్తుంది. ఆమె రాకతో ఆ కుటుంబ ప్రశాంతత పూర్తిగా దెబ్బతింటుంది. అనూహ్యమైన పరిణామాలు ఎదురవుతాయి. అసలు అముద ఎవరు? ఆ కుటుంబంలోకి ఎందుకు వచ్చింది? ఆమెకు, నివాస్ (శ్రీనివాస్ అవసరాల) అనే వ్యక్తికి ఉన్న సంబంధం ఏమిటి? అనేది తెలియాలంటే ఈ సినిమా చూడాల్సిందే..

దర్శకుడు సినిమాను ప్రారంభించిన తీరు ప్రేక్షకులను వెంటనే కథలోకి తీసుకెళ్తుంది. ఒక సైకలాజికల్ థ్రిల్లర్‌కు అవసరమైన ఉత్కంఠను మొదటి భాగంలో బాగానే మెయింటైన్ చేశారు. ముఖ్యంగా డాక్టర్ యోగి, అముద మధ్య వచ్చే సన్నివేశాలు మానవ సంబంధాల్లోని సంక్లిష్టతను, ఎవరూ ఊహించని కోణాలను ఆవిష్కరిస్తాయి. భార్యాభర్తలుగా జగపతి బాబు, లయ మధ్య అనుబంధాన్ని, అన్యోన్యతను చాలా సహజంగా చూపించారు కానీ మధ్య మధ్యలో కొన్ని బోరింగ్ సన్నివేశాలు పెట్టి సగటు ప్రేక్షకుడికి చిరాకు తెప్పించారు.

ఒక బాధ్యతాయుతమైన వైద్యుడిగా, కుటుంబం కోసం పరితపించే తండ్రిగా జగపతి బాబు తన సీనియారిటీని, నటనలోని పరిణతిని మరోసారి నిరూపించుకున్నారు. లయ తన పాత్రలో ఒదిగిపోయింది. సినిమా ప్రారంభంలో ఎంతో సహజంగా కనిపించిన ఆమె, ముగింపులో భర్తను కాపాడుకునే క్రమంలో అద్భుతమైన భావోద్వేగాలను పండించింది.

కార్తీక్ బి. కొడకండ్ల అందించిన సంగీతం, నేపథ్య సంగీతం థ్రిల్లర్ మూడ్‌కు సరిగ్గా సరిపోయాయి. చోటా కే నాయుడు కెమెరా వర్క్, ఎడిటింగ్ పర్వాలేదు. నిర్మాణ విలువలు కూడా బాగానే ఉన్నాయి. దర్శకుడు ఆకెళ్ల వి కృష్ణ ఎంచుకున్న పాయింట్ సున్నితమైనదే అయినా, దాన్ని చెప్పిన విధానంలో ఇంకాస్త పదును పెడితే బాగుండేది.