కొత్త కుర్రాళ్లకు అవకాశాలు ఇస్తూనే సీనియర్లకు విశ్రాంతి కల్పించే విధానాన్ని ఆయన విజయవంతంగా అమలు చేశాడు. అయితే, ఫిబ్రవరిలోనే బోర్డు ఉన్నతాధికారులతో జరిగిన కీలక చర్చల్లో తన పదవీకాలం ముగిసిన తర్వాత వేరే ప్రత్యామ్నాయాలను వెతుక్కోవాలని ఆయన ముందే సూచించినట్లు బీసీసీఐ వర్గాలు వెల్లడించాయి.

అగార్కర్ నిష్క్రమణతో తదుపరి చీఫ్ సెలెక్టర్ ఎవరనే దానిపై ఆసక్తికర చర్చ నడుస్తోంది. మాజీ వికెట్ కీపర్, డాషింగ్ బ్యాటర్ పార్థివ్ పటేల్ ఈ రేసులో ముందున్నట్లు వార్తలు వస్తున్నాయి. యువ ఆటగాళ్లతో అతనికి ఉన్న సాన్నిహిత్యం, ఆధునిక క్రికెట్‌పై ఉన్న అవగాహన అతనికి కలిసొచ్చే అంశాలు. పార్థివ్ పేరును బోర్డు పెద్దలు సీరియస్‌గా పరిశీలిస్తున్నట్లు తెలుస్తోంది.

మరోవైపు అగార్కర్ భవిష్యత్తుపై తుది నిర్ణయం తీసుకునే అధికారాన్ని బీసీసీఐ సభ్యులు ఆఫీస్ బేరర్లకు అప్పగించారు. సెలెక్షన్ కమిటీకి సంబంధించిన అన్ని వ్యవహారాలను వారే చూసుకుంటారని ఓ సీనియర్ అధికారి వెల్లడించారు. అవసరమైతే అగార్కర్‌కు ఎక్స్‌టెన్షన్ ఇవ్వాలా లేక కొత్త వారిని ఎంచుకోవాలా అనే దానిపై వారు త్వరలో తుది నిర్ణయం తీసుకుంటారు.

సీనియర్ సెలెక్షన్ కమిటీ చైర్మన్ వ్యవహారంతో పాటు జూనియర్ సెలెక్షన్ కమిటీలో ఖాళీగా ఉన్న మొత్తం ఐదు స్థానాలను భర్తీ చేసేందుకు కూడా బీసీసీఐ కసరత్తు చేస్తోంది. దేశవాళీ క్రికెట్ అనుభవం ఉన్న మాజీ ఆటగాళ్లను ఈ పోస్టులకు ఎంపిక చేయాలని భావిస్తోంది. త్వరలోనే ఈ రెండు కమిటీలపై అధికారిక ప్రకటన వెలువడే అవకాశం ఉంది.