పోలీసుల కథనం ప్రకారం.. కౌకూర్ లోని అత్యంత విలాసవంతమైన ‘మోహన్స్ గోల్ఫ్ ఎన్క్లేవ్’లో అంతర్జాతీయ ఆర్బిట్రేటర్ మురళీ మోహన్ నర్సిపురం (68) తన భార్యతో కలిసి నివసిస్తున్నారు. ఆ ఇంట్లో వృద్ధ దంపతులు ఇద్దరే ఒంటరిగా ఉంటున్నారనే విషయాన్ని అక్కడ పనిచేసే రాజేష్, మీనా అనే నేపాల్ కార్మికులు గమనించారు. ఎలాగైనా ఆ ఇంట్లో పెద్ద ఎత్తున దోపిడీ చేసి లగ్జరీ లైఫ్ గడపాలని వారు పక్కా స్కెచ్ వేశారు. ఇందుకోసం తమ దేశానికే చెందిన సబీనా అలియాస్ సునీత, చాంగ్, సామ్రాట్, బిస్వాల్, కమల్, జంకర్ అలియాస్ శంకర్ అనే వ్యక్తులతో కలిసి ఒక పెద్ద ముఠాగా ఏర్పడ్డారు.
వ్యూహం ప్రకారం.. మీనా అనే నిందితురాలు మురళీ మోహన్ ఇంట్లో సబీనాను పనిమనిషిగా చేర్పించింది. రాజేష్ను ఆమె భర్తగా పరిచయం చేసింది. గత ఏప్రిల్ 25 నుంచే ఇంట్లోకి ప్రవేశించిన ఈ ముఠా సరైన సమయం కోసం వేచి చూసింది. ఈ క్రమంలో మే 11న సర్వెంట్ క్వార్టర్స్లో మీనా పుట్టినరోజు వేడుకలు జరుగుతున్నాయంటూ ఒక పెద్ద నాటకానికి తెరలేపారు. ఆ నెపంతో రాత్రి వేళ రాజేష్, సబీనా, మీనా, చాంగ్, సామ్రాట్ అనే ఐదుగురు నిందితులు ప్లాన్ ప్రకారం యజమాని ఇంట్లోకి చొరబడగా, మిగిలిన ముఠా సభ్యులు ఎవరికీ అనుమానం రాకుండా బయట కాపలాగా నిలబడ్డారు.
రాత్రి సుమారు 8:30 గంటల సమయంలో ఇంట్లోకి ప్రవేశించిన నిందితులు ఒక్కసారిగా వృద్ధ దంపతులపై దాడి చేసి వారిని బంధించారు. ఆపై వారికి బలవంతంగా ఒక ఘాటైన అపరిచిత మత్తు పదార్థాన్ని తినిపించి, స్పృహతప్పేలా చేశారు. ఆ వృద్ధులు పూర్తిగా అచేతన స్థితిలోకి వెళ్లిన తర్వాత ప్లాస్టిక్ టేపులు, గుడ్డలతో వారి కాళ్లు, చేతులు కట్టేసి పడేశారు. అనంతరం వెంట తెచ్చుకున్న గడ్డపారలు, పదునైన ఆయుధాలతో ఇంట్లోని అల్మారాలను, లాకర్లను పగలగొట్టారు. లాకర్లలో భద్రపరిచిన సుమారు 60 తులాల బంగారు ఆభరణాలు, 15 కిలోల వెండి వస్తువులు, రెండు మొబైల్ ఫోన్లు మరియు 3 వేల యూఎస్ డాలర్ల (US Dollars) నగదుతో పాటు ఇంట్లోని ఇతర విలువైన వస్తువులను దోచుకుని రాత్రికి రాత్రే పరారయ్యారు.
బాధితుల ఫిర్యాదుతో రంగంలోకి దిగిన జవాహర్నగర్ పోలీసులు బీఎన్ఎస్ (BNS) చట్టంలోని వివిధ కఠిన సెక్షన్ల కింద కేసు నమోదు చేశారు. క్లూస్ టీమ్ ఘటనా స్థలంలో సేకరించిన వేలిముద్రలను పరిశీలించగా, అవి పనిమనిషి మీనా వేలిముద్రలతో సరిపోలడంతో నేపాల్ ముఠా పనేనని తేలిపోయింది. నిందితులు దోపిడీ అనంతరం ఆటో, స్కూటర్లపై యాప్రాల్ మీదుగా సికింద్రాబాద్ రైల్వే స్టేషన్కు చేరుకుని, అక్కడి నుంచి రైళ్లలో దేశం దాటిపోయేందుకు ప్రయత్నించారు.
దీనితో మల్కాజిగిరి సీపీ సుమతి ఆదేశాల మేరకు లా అండ్ ఆర్డర్, సీసీఎస్, ఎస్ఓటీ (SOT) విభాగాలతో కలిపి మొత్తం 6 ప్రత్యేక బృందాలను ఏర్పాటు చేశారు. నిందితుల ప్రయాణ మార్గాల్లోని సుమారు 250కి పైగా సీసీటీవీ (CCTV) కెమెరాల ఫుటేజీలను పోలీసులు నిశితంగా పరిశీలించారు. నిందితులను పట్టుకోవడానికి ప్రత్యేక బృందాలను బెంగళూరు, లక్నో మరియు నేపాల్ సరిహద్దు ప్రాంతాలకు పంపించారు.
సాంకేతిక పరిజ్ఞానం, క్షేత్రస్థాయి ఇన్ఫార్మర్ల సమాచారంతో ఐదు రోజుల పాటు రాత్రింబగళ్లు నిరంతరాయంగా శ్రమించిన పోలీసులు.. శనివారం ఉదయం 10:45 గంటల ప్రాంతంలో సికింద్రాబాద్లోని రేతిఫైల్ బస్ స్టేషన్ వద్ద నలుగురు నిందితులను అడ్డుకుని అరెస్ట్ చేశారు. పట్టుబడిన వారిలో సునీత అలియాస్ సబీనా (28), బిస్వాల్ (30), కమల్ బహదూర్ చలానే (34), జంకర్ బహదూర్ చలానే అలియాస్ శంకర్ (38) ఉన్నారు. వీరంతా నేపాల్ దేశానికి చెందిన వారని పోలీసులు స్పష్టం చేశారు. నిందితులు తమ నేరాన్ని అంగీకరించడంతో వారి నుంచి దొంగిలించబడిన సొత్తును రికవరీ చేశారు. ప్రస్తుతం పరారీలో ఉన్న మిగిలిన ప్రధాన నిందితులు రాజేష్, మీనా, చాంగ్ ల కోసం గాలింపు ముమ్మరం చేశారు. ఈ కేసును అత్యంత చాకచక్యంగా ఛేదించిన పోలీస్ అధికారులను, సిబ్బందిని కమిషనర్ ప్రత్యేకంగా అభినందించారు.
