తిరుమాడ వీధుల్లో విహరిస్తున్న శ్రీవారిని చూసి వేలాది మంది భక్తులు భక్తిపారవశ్యంతో చేతులెత్తి మొక్కుకున్నారు. “గోవిందా.. గోవిందా” అంటూ చేసిన నామస్మరణతో అఖిలాండకోటి బ్రహ్మాండ నాయకుడి క్షేత్రం ప్రతిధ్వనించింది. స్వామివారి వాహనం ముందు భక్తబృందాలు చేసిన చెక్కభజనలు, కోలాటాలు ఉత్సవానికి మరింత శోభను తెచ్చాయి. మంగళవాయిద్యాల నడుమ అత్యంత వైభవంగా సాగిన ఈ వేడుకలో స్వామివారిని కీర్తిస్తూ కళాకారులు చేసిన ప్రదర్శనలు అందరినీ ఆకట్టుకున్నాయి. ఈ దివ్యమైన ఘట్టాన్ని కనులారా వీక్షించిన ప్రతి భక్తుడూ జన్మ ధన్యమైందన్న ఆనందంతో పరవశించారు.

ఈ వైభవపేతమైన సూర్యప్రభ వాహనసేవలో పలువురు ప్రముఖులు, ఉన్నతాధికారులు భాగస్వాములయ్యారు.  పెద్దజీయర్‌స్వామి,  చిన్నజీయర్‌స్వామి ఈ పవిత్ర కార్యక్రమంలో పాల్గొని స్వామివారి ఆశీస్సులు అందుకున్నారు. వారితో పాటు టీటీడీ ఈవో ముద్దాడ రవిచంద్ర, అదనపు ఈవో సి.హెచ్. వెంకయ్య చౌదరి, సీవీఎస్వో కె.వి. మురళీకృష్ణ స్వామివారి సేవలో తరించారు. వీరేకాకుండా పలువురు బోర్డు సభ్యులు, ఇతర అధికారులు పెద్ద సంఖ్యలో హాజరై బ్రహ్మోత్సవాల ఏర్పాట్లను పర్యవేక్షించారు. వాహనసేవల సందర్భంగా భక్తులకు ఎలాంటి అసౌకర్యం కలగకుండా విస్త్రృతమైన ఏర్పాట్లు చేశారు.