జపాన్ క్రికెట్ రాజధానిగా గుర్తింపు పొందిన సానో నగరంలోని అంతర్జాతీయ క్రికెట్ మైదానం ఈ అరుదైన మ్యాచ్‌కు ఆతిథ్యమిస్తోంది. కెండెల్ కడోవాకి ఫ్లెమింగ్ సారథ్యంలోని జపాన్ జట్టు, శ్రేయస్ అయ్యర్ నాయకత్వంలోని పటిష్టమైన భారత జట్టుకు ఏమేరకు పోటీ ఇవ్వగలదన్నది ఆసక్తికరంగా మారింది. ఈ మ్యాచ్ ఫలితం కంటే కూడా, ఆసియా క్రీడల్లో బరిలోకి దిగడానికి ముందు అక్కడి వాతావరణం, పిచ్ పరిస్థితులు, గాలి వేగం వంటి అంశాలపై స్పష్టమైన అవగాహన పెంచుకోవడానికి టీమ్‌ఇండియాకు ఈ మ్యాచ్ ఒక గొప్ప అవకాశంగా మారనుంది.

ఇటీవల ఆఫ్ఘనిస్థాన్‌తో ముగిసిన టీ20 సిరీస్‌లో తుది జట్టులో చోటు దక్కించుకోలేకపోయిన యువ ఓపెనర్ వైభవ్ సూర్యవంశీకి ఈ మ్యాచ్‌లో ఆడే అవకాశం లభించే సూచనలు కనిపిస్తున్నాయి. ఐపీఎల్, దేశవాళీల్లో మెరిసి జాతీయ జట్టులోకి వచ్చిన వర్ధమాన ఆటగాళ్లకు అంతర్జాతీయ పరిస్థితుల్లో తమ సత్తా నిరూపించుకోవడానికి ఇది మంచి వేదిక కానుంది. భారత్ తొలుత బ్యాటింగ్ చేస్తే మాత్రం భారీ స్కోరు నమోదవ్వడం ఖాయం. అంతర్జాతీయ టి20ల్లో జింబాబ్వే గాంబియాపై 344 పరుగులు చేసింది. ప్రస్తుతానికి ఇదే అత్యధిక టి20 స్కోరు. భారత్ మొదట బ్యాటింగ్ చేస్తే ఇది బద్దలవ్వడం ఖాయం. ఇక అభిషేక్, వైభవ్‌లు ఓపెనర్లుగా వస్తే మాత్రం జపాన్‌కు పట్టపగలే చుక్కలు కనిపించడం ఖాయం.

శ్రేయస్ అయ్యర్ నేతృత్వంలోని భారత జట్టు బ్యాటింగ్, బౌలింగ్ విభాగాల్లో కొత్త కలయికలను పరీక్షించుకోవాలని యోచిస్తోంది. బ్యాటింగ్, బౌలింగ్ విభాగాల్లో జట్టు ఎంతో పటిష్టంగా కనిపిస్తోంది. జపాన్ బౌలర్లను భారత బ్యాటర్లు ఏ విధంగా ఎదుర్కొంటారో చూడటంతో పాటు, ఆసియా క్రీడల ప్రధాన మ్యాచ్‌లకు ముందు జట్టు సభ్యులందరికీ మ్యాచ్ ప్రాక్టీస్ అందించడమే భారత మేనేజ్‌మెంట్ ముఖ్య ఉద్దేశం. బలాబలాల పరంగా భారత్‌దే పైచేయి అయినప్పటికీ, సరికొత్త పిచ్‌పై జరిగే ఈ వినూత్న పోరు క్రికెట్ ప్రేమికులకు కొత్త అనుభూతిని పంచనుంది. ఈ మ్యాచ్ ఫ్యాన్ కోడ్ యాప్‌లో ప్రత్యక్షప్రసారం కానుంది.