హ్యూస్ చేసిన వ్యాఖ్యలపై అమెరికా సైన్యంలో పనిచేసిన మాజీ సైనికుడు రుచిర్ బక్షి తీవ్రంగా మండిపడ్డారు. ఈ వ్యాఖ్యలు దేశభక్తికి విరుద్ధమని, “హిందూ మతంపై జరుగుతున్న దాడి” అని ఆయన అభివర్ణించారు. “ఒక మతాన్ని ద్వేషిస్తూ మరో అమెరికన్ సమాజానికి చెందిన ప్రార్థనా మందిరాన్ని ధ్వంసం చేయాలనుకోవడం హిందూ మతానికే ముప్పు. అమెరికాలో గెలవడం అంటే హిందూ దేవాలయాలను కూల్చడమే అయితే, నేను పోరాడి కాపాడిన దేశం ఇది కాదు. మీకంటే భిన్నంగా ఉన్న ప్రజలపై దాడి చేయడానికి మీరు కేవలం లైసెన్స్ కోరుకుంటున్నారు” అని ఆయన ఆవేదన వ్యక్తం చేశారు.

ఐదు లక్షలకు పైగా భారతీయ అమెరికన్లు నివసిస్తున్న టెక్సాస్‌లో ఎన్నికల ప్రచారంలో భాగంగా వలసదారుల వ్యతిరేక అంశాలు తెరపైకి రావడం గమనార్హం. ఇటీవల టెక్సాస్ రైల్‌రోడ్ కమిషనర్ రేసులో ఉన్న రిపబ్లికన్ అభ్యర్థి బో ఫ్రెంచ్ కూడా దక్షిణాసియా మూలాలున్న విద్యార్థులపై జాత్యహంకార వ్యాఖ్యలు చేసి వివాదంలో చిక్కుకున్నారు. ఫుట్‌బాల్ మ్యాచ్ విజయోత్సవంలో పాల్గొన్న విద్యార్థుల ఫోటోను షేర్ చేస్తూ ఆయన అనుచిత వ్యాఖ్యలు చేయగా, డెమొక్రాట్లతో పాటు పలువురు రిపబ్లికన్ నేతలు సైతం ఆయన తీరును తప్పుబట్టారు. టెక్సాస్‌లో ఎన్నికల వేడి కొనసాగుతున్న తరుణంలో, పవిత్రమైన ఆలయ విగ్రహంపై ఇలాంటి వ్యాఖ్యలు రావడం స్థానిక భారతీయ వర్గాల్లో తీవ్ర ఆందోళనకు దారితీసింది.