Last Updated:
వచ్చే ఏడాది జరగనున్న 2027 ఐసీసీ వన్డే ప్రపంచకప్ భారత్ తరఫున తనకు చివరి మెగా టోర్నీ అని స్టార్ బ్యాటర్ విరాట్ కోహ్లీ స్పష్టం చేశారు. తన ఆఖరి ప్రపంచకప్లో టైటిల్ గెలవడమే లక్ష్యమని, అందుకోసం సర్వశక్తులూ ఒడ్డుతానని ప్రకటించారు.
భారత క్రికెట్ దిగ్గజం, స్టార్ బ్యాటర్ విరాట్ కోహ్లీ తన వన్డే కెరీర్పై కీలక ప్రకటన చేశారు. వచ్చే ఏడాది (2027) అక్టోబర్-నవంబర్ నెలల్లో దక్షిణాఫ్రికా, జింబాబ్వే, నమీబియా వేదికలుగా జరగనున్న ఐసీసీ పురుషుల వన్డే ప్రపంచకప్ భారత జట్టు తరఫున తనకు చివరి 50 ఓవర్ల మెగా టోర్నీ అని ధృవీకరించారు. మొత్తం 12 వేదికల్లో జరగనున్న ఈ టోర్నీలో భారత్కు విశ్వకిరీటం అందించడమే తన ఏకైక లక్ష్యమని తేల్చిచెప్పారు. వెస్టిండీస్తో జరగనున్న మూడు వన్డేల సిరీస్కు ముందు జియోస్టార్ (JioStar) షోలో మాట్లాడుతూ కోహ్లీ ఈ వ్యాఖ్యలు చేశారు.
2011లో మహేంద్ర సింగ్ ధోనీ సారథ్యంలో తొలిసారి వన్డే ప్రపంచకప్ ఆడి టైటిల్ గెలిచిన కోహ్లీ.. ఇప్పటివరకు 2011, 2015, 2019, 2023లలో మొత్తం నాలుగు వన్డే ప్రపంచకప్లలో భారత్కు ప్రాతినిధ్యం వహించారు. ఇప్పటికే టీ20, టెస్ట్ ఫార్మాట్ల నుంచి రిటైర్మెంట్ ప్రకటించిన ఆయన కేవలం వన్డేల్లో మాత్రమే కొనసాగుతున్న సంగతి తెలిసిందే.
వన్డే ప్రపంచకప్ చరిత్రలో సచిన్ టెండూల్కర్ తర్వాత అత్యధిక పరుగులు చేసిన రెండో ఆటగాడిగా కోహ్లీ కొనసాగుతున్నారు. ముఖ్యంగా 2023 వన్డే ప్రపంచకప్లో ఏకంగా 765 పరుగులు సాధించి, ఒకే ఎడిషన్లో అత్యధిక పరుగులు చేసిన ఆటగాడిగా ప్రపంచ రికార్డు సృష్టించారు. భారత్ తరఫున ఇప్పటివరకు 314 వన్డేలు ఆడిన కోహ్లీ 14,941 పరుగులు సాధించి, వన్డేల్లో 15 వేల పరుగుల మైలురాయికి కేవలం 59 పరుగుల దూరంలో ఉన్నారు.
50 ఓవర్ల ప్రపంచకప్లో తీవ్రత చాలా ఎక్కువగా ఉంటుందని కోహ్లీ పేర్కొన్నారు. ఒకే రోజు రెండున్నర టీ20 మ్యాచ్లు ఆడినంత శ్రమతో వరుసగా పది మ్యాచ్లలో అదే దూకుడు కొనసాగించడం, అది కూడా విదేశీ పిచ్లపై ఆడటం సవాలుతో కూడుకున్న పని అని చెప్పారు. “భారత్ తరఫున నేను ఆడబోయే చివరి ప్రపంచకప్ ఇదే. మైదానంలో నా సర్వశక్తులూ ధారపోయడానికి ఇదే నాకు పెద్ద స్ఫూర్తి. ప్రపంచకప్ గెలవడమే నా లక్ష్యం, అందుకోసం ఏం చేయడానికైనా నేను పూర్తిగా సిద్ధంగా ఉన్నాను” అని కోహ్లీ ఉద్వేగంగా తెలిపారు.
మరోవైపు భారత మాజీ కెప్టెన్ రోహిత్ శర్మ సైతం 2027 వన్డే ప్రపంచకప్లో ఆడటమే లక్ష్యంగా పెట్టుకున్నారు. తన పని అయిపోయిందనే ఆలోచన ఎప్పుడూ రాదని, ఆడుతున్నంత కాలం ముందున్న సవాళ్ల కోసమే ఎదురుచూస్తానని రోహిత్ చెప్పారు. ఐసీసీ టోర్నీల్లో వేర్వేరు వేదికలపై విభిన్న ప్రత్యర్థులతో ఆడాల్సి ఉంటుందని, అందుకోసం కొత్త ప్రణాళికలతో సిద్ధమవుతున్నానని రోహిత్ శర్మ వెల్లడించారు.
