Last Updated:
బడి పిల్లల ఆలోచనలు ఎలా మారిపోతున్నాయో చూడండి. జస్ట్ ఒక్క ఇంచు.. ఆ నరం తెగి ఉంటే ప్రాణాలు గాల్లోకే.
బడికి వెళ్లిన తమ పిల్లలు సురక్షితంగా తిరిగి వస్తారో లేదో అని తల్లిదండ్రులు భయపడే స్థాయికి పాఠశాలల్లో పరిస్థితులు దిగజారుతున్నాయి. తోటి విద్యార్థులతో కలసిమెలసి ఆడుకుంటూ చదువుకోవాల్సిన వయసులో ఓ విద్యార్థి కరుడుగట్టిన నేరస్థుడిలా మారాడు. తరగతి గదిలో ఉపాధ్యాయురాలు ఉండగానే ఓ తొమ్మిదో తరగతి పిల్లాడిపై మరో విద్యార్థి పదునైన ఆయుధంతో దాడికి తెగబడ్డాడు. కోల్‌కతాలోని గరియాహాట్ ప్రాంతంలో ఉన్న ప్రముఖ సౌత్ పాయింట్ స్కూల్‌లో జరిగిన ఈ దారుణ ఘటన విద్యార్థులు, ఉపాధ్యాయులు, తల్లిదండ్రుల్లో తీవ్ర ఆందోళన రేకెత్తిస్తోంది.
బుధవారం మధ్యాహ్నం 12.29 గంటల సమయంలో తొమ్మిదో తరగతి ‘సి’ సెక్షన్‌లో ఈ దాడి జరిగింది. హౌరాలోని ధర్మతలా లేన్‌కు చెందిన 15 ఏళ్ల బాధితుడిపై క్లాస్‌మేట్ ఒక్కసారిగా పదునైన వస్తువుతో విరుచుకుపడ్డాడు. ఈ ఘటనలో బాధితుడి మెడపై, ఎడమ చేతి వేళ్లపై తీవ్రమైన గాయాలు అయ్యాయి. విపరీతంగా రక్తం కారుతుండటంతో అప్రమత్తమైన ఉపాధ్యాయులు వెంటనే స్కూల్ ఇన్‌ఫర్మరీలో ప్రాథమిక చికిత్స అందించారు. అనంతరం మెరుగైన వైద్యం కోసం రూబీ జనరల్ ఆసుపత్రికి హుటాహుటిన తరలించి బాలుడి కుటుంబ సభ్యులకు సమాచారం అందించారు.
ఆసుపత్రిలో ప్లాస్టిక్ సర్జన్ డాక్టర్ దీపంజన్ దే ఆధ్వర్యంలో బాలుడికి శస్త్రచికిత్స నిర్వహించారు. మెడపై ఉన్న గాయం ముఖం వరకు వ్యాపించిందని, లోపలి కండరాలు దెబ్బతిన్నాయని వైద్యులు గుర్తించారు. వేళ్లను కదిలించే టెండన్ నరాలు కూడా తెగిపోయాయి. గుండె నుంచి మెదడుకు రక్తం సరఫరా చేసే ప్రధాన ధమని పక్కనే ఈ గాయం అయిందని, ఆయుధం కాస్త తగిలినా ప్రాణానికే ముప్పు వాటిల్లేదని డాక్టర్ జైదీప్ ఘోష్ ఆందోళన వ్యక్తం చేశారు. ప్రస్తుతం అన్ని గాయాలకు చికిత్స అందించామని, బాలుడి పరిస్థితి నిలకడగా ఉందని వైద్య బృందం స్పష్టం చేసింది.
ఈ దాడి వెనుక ఆసక్తికరమైన విషయాలు వెలుగులోకి వచ్చాయి. మంగళవారం బాధితుడు బాత్రూమ్‌కు వెళ్లిన సమయంలో నిందితుడు పుస్తకం చించేశాడు. దీనిపై ఉపాధ్యాయులకు బాధితుడు ఫిర్యాదు చేయడంతో వారు నిందితుడిని మందలించి క్రమశిక్షణా చర్యగా కాసేపు ఐసోలేషన్‌లో ఉంచారు. ఆ కక్షతోనే మరుసటి రోజు ఉదయం కసిగా దాడి చేసినట్లు బాధితుడి తండ్రి అనుమానం వ్యక్తం చేశారు. నిందితుడు ఆటిజం సమస్యతో బాధపడుతున్నాడని స్కూల్ వర్గాలు వెల్లడించాయి. దారుణానికి ఒడిగట్టే ముందు నరాలకు గాయాలైతే ఏమవుతుంది, మైనర్‌గా ఉంటూ తప్పు చేస్తే చట్టపరంగా ఎదురయ్యే పరిణామాలు ఏమిటి అనే విషయాలపై నిందితుడు ఆన్‌లైన్‌లో వెతికినట్లు సమాచారం.
ఇంత ఘోరం జరిగినా బాధితుడి తండ్రి ఎంతో హుందాగా వ్యవహరించారు. దాడి చేసిన బాలుడిపై ఎలాంటి పోలీసు ఫిర్యాదు చేయబోమని, తమ కుమారుడి కోలుకోవడం పైనే ప్రస్తుతం దృష్టి పెట్టామని ఆయన స్పష్టం చేశారు. నేరానికి పాల్పడిన ఆ చిన్నారికి మానసిక కౌన్సెలింగ్ అవసరమని అభిప్రాయపడ్డారు. సమాజంలో నైతిక విలువలు పతనమవుతున్నాయనడానికి ఈ ఘటనే నిదర్శనం అన్నారు. కుమారుడు పూర్తిగా కోలుకున్న తర్వాత అదే స్కూల్‌కు పంపిస్తానని ధైర్యంగా చెప్పారు. పిల్లలను బడికి పంపాలంటేనే ఈ ఘటనతో స్థానికులు తీవ్ర భయాందోళనలకు గురవుతున్నారు.
స్కూల్ యాజమాన్యం ఇచ్చిన ఫిర్యాదుతో గరియాహాట్ పోలీసులు కేసు నమోదు చేసి దర్యాప్తు ముమ్మరం చేశారు. ఆ పదునైన ఆయుధం స్కూల్ లోపలికి ఎలా వచ్చిందనే కోణంలో ఆరా తీస్తున్నారు. నేడు (అక్టోబర్ 1, 2026) పాఠశాల యథావిధిగా నడుస్తోంది. నిందితుడిని ఇంట్లోనే ఉంచి నిపుణులైన సైకాలజిస్ట్‌తో కౌన్సెలింగ్ ఇప్పించాలని స్కూల్ యాజమాన్యం సూచించింది. జరిగిన దారుణంతో ఇతర విద్యార్థుల మానసిక పరిస్థితిపై పడే ప్రభావాన్ని తగ్గించేందుకు అవసరమైన అన్ని చర్యలు తీసుకుంటున్నట్లు పాఠశాల ప్రతినిధులు వెల్లడించారు.
