ఇటీవల తమిళనాడు అసెంబ్లీ ఎన్నికల్లో నటుడు ‘దళపతి’ విజయ్ తన ‘తమిళగ వెట్రి కళగం’ (TVK) పార్టీ ద్వారా సాధించిన అఖండ విజయాన్ని, ఆయనకు లభించిన ప్రజాదరణను శివరాజ్ కుమార్ ఈ సందర్భంగా ప్రస్తావించారు. “పొరుగు రాష్ట్రమైన తమిళనాడులో నటుడు విజయ్‌ను ప్రజలు అంతలా ఆదరించి గెలిపించినప్పుడు.. కర్ణాటకలో మన ఉపేంద్రకు అలాంటి మద్దతు ఎందుకు ఇవ్వకూడదు? భవిష్యత్తులో ఉపేంద్ర కర్ణాటక ముఖ్యమంత్రి కావాలని నేను మనస్ఫూర్తిగా ఆకాంక్షిస్తున్నాను” అని శివన్న వ్యాఖ్యానించారు.

నటీనటులు కేవలం వెండితెరపై మాత్రమే ముఖానికి రంగులు వేసుకుంటారని, నిజ జీవితంలో రంగులు మార్చరని, ఎంతో నిజాయతీగా ఉంటారని ఆయన స్పష్టం చేశారు. ఉపేంద్ర ఇప్పటికే ‘ఉత్తమ ప్రజాకీయ పార్టీ’ (UPP) ద్వారా రాజకీయాల్లో మార్పు కోసం ప్రయత్నిస్తున్న సంగతి తెలిసిందే.

అయితే, తనకు మాత్రం ప్రత్యక్ష రాజకీయాల్లోకి వచ్చే ఉద్దేశం అస్సలు లేదని ఈ సందర్భంగా శివన్న పూర్తి స్పష్టత ఇచ్చారు. తమ అభిమానులు కూడా రాజకీయాల కోసం కాకుండా, సమాజంలో నలుగురికీ సాయం చేస్తూ అందరికీ ఆదర్శంగా నిలవాలని పిలుపునిచ్చారు. ‘పెద్ది’ సినిమా ప్రమోషన్లలో భాగంగా శివరాజ్ కుమార్ చేసిన ఈ వ్యాఖ్యలు ప్రస్తుతం సోషల్ మీడియాలో విపరీతంగా ట్రెండ్ అవుతున్నాయి.