ఈ సందర్భంగా కృష్ణసాయి, కృతి వర్మలపై చిత్రీకరించిన ప్రత్యేక గీతాన్ని చిత్రబృందం విడుదల చేసింది. సూపర్‌స్టార్ కృష్ణపై రూపొందించిన ఈ గీతం అభిమానులను విశేషంగా ఆకట్టుకుంటోంది. ఈ సందర్భంగా దర్శకుడు సంజీవ్ మేగోటి మాట్లాడుతూ, “సూపర్‌స్టార్ కృష్ణ గారి సోదరుడు ఘట్టమనేని ఆదిశేషగిరిరావు గారు మా చిత్రాన్ని, ముఖ్యంగా కృష్ణ గారిపై రూపొందించిన ప్రత్యేక గీతాన్ని మెచ్చుకోవడం మా యూనిట్‌కు ఎంతో గర్వకారణం. ఆయన ఆశీర్వాదాలు మాకు మరింత ఉత్సాహాన్ని ఇచ్చాయి. ఈ చిత్రాన్ని 52 మంది సీనియర్ ఆర్టిస్టులతో కేవలం 45 రోజుల్లో పూర్తి చేశాం. ‘చైన్ రియాక్షన్ ఆఫ్ కర్మ’ అనే వైవిధ్యమైన కాన్సెప్ట్ చుట్టూ కథ సాగుతుంది. హారర్ థ్రిల్లర్ అంశాలతో పాటు యాక్షన్, ఎమోషన్స్ కలగలిసిన ఈ చిత్రం ప్రేక్షకులకు కొత్త అనుభూతిని అందిస్తుంది” అన్నారు.

హీరో కృష్ణసాయి మాట్లాడుతూ, “మా అభిమాన హీరో సూపర్‌స్టార్ కృష్ణ గారిపై రూపొందించిన పాటలో నటించే అవకాశం రావడం నా అదృష్టంగా భావిస్తున్నాను. ఆ పాటను కృష్ణ గారి సోదరుడు ఆదిశేషగిరిరావు గారు చూసి ప్రశంసించడం మాకు ఎంతో ఆనందాన్ని కలిగించింది. దర్శకుడు సంజీవ్ మేగోటి సినిమాను అద్భుతంగా తెరకెక్కించారు. ఇండస్ట్రీలో ఈ చిత్రం పెద్ద హిట్ అవుతుందనే నమ్మకం ఉంది. అన్ని వర్గాల ప్రేక్షకులను అలరించే అంశాలు ఇందులో ఉన్నాయి. అందరూ థియేటర్లలో సినిమా చూసి ఆదరించాలని కోరుకుంటున్నాను” అన్నారు.

నవీన్ చంద్ర, వరలక్ష్మి శరత్‌కుమార్, కృష్ణసాయి, రాగిణి ద్వివేది ప్రధాన పాత్రల్లో నటించిన ఈ చిత్రంపై ఆదిశేషగిరిరావు ఆశీర్వాదాలతో అంచనాలు మరింత పెరిగాయి. హారర్, యాక్షన్, కామెడీ, రొమాన్స్, థ్రిల్లర్ అంశాల సమ్మేళనంగా రూపొందిన ఈ చిత్రం ప్రేక్షకులకు వినూత్నమైన సినీ అనుభూతిని అందించనుందని చిత్రబృందం విశ్వాసం వ్యక్తం చేస్తోంది.

ఇప్పటికే విడుదలైన ట్రైలర్‌తో పాటు ప్రత్యేక గీతాలు కూడా మంచి స్పందనను సొంతం చేసుకోవడంతో ‘పోలీస్ కంప్లైంట్’పై సినీ ప్రేక్షకుల్లో ఆసక్తి నెలకొంది.

ఈ సినిమాలో వరలక్ష్మి శరత్‌కుమార్, నవీన్ చంద్ర, కృష్ణసాయి, రాగిణి ద్వివేది, ఆదిత్య ఓం, రవిశంకర్, పృథ్వి, కృతి వర్మ, శ్రీనివాస్ రెడ్డి, సప్తగిరి, ప్రీతీ సుందర్, శరత్ లోహితశ్వ, జెమినీ సురేష్, దిల్ రమేష్, మధు నంబియార్, సత్తెన్న, విజయభాస్కర్, అనిల్ రాజ్, శ్రీహర్ష, దేవేందర్, పుష్పారామ్, డీఎస్పీ తదితరులు కీలక పాత్రల్లో నటించగా.. ఆరోహణ సుధీంద్ర, సంజీవ్ మేగోటి, సుధాకర్ మారియో సంగీతం అందించారు.