ఒక ప్రేక్షకుడు తన రివ్యూలో ఈ చిత్రాన్ని “హృదయం బలహీనంగా ఉన్నవారు చూడలేని భయానక అనుభవం”గా అభివర్ణించాడు. సినిమా ముగిసిన తర్వాత కూడా దాని ప్రభావం మనసులో కొనసాగుతుందని పేర్కొన్నాడు. అంతేకాదు, ఓ హాంటెడ్ హౌస్‌లోకి వెళ్లి భయపడిన తర్వాత బయటకు వచ్చాక కలిగే వింత సంతృప్తి ఈ సినిమా చూసిన తర్వాత కూడా కలిగిందని వివరించాడు. కథలోని అధివాస్తవిక (Surreal) అంశాలు, ఎప్పటికీ ముగియని లూప్‌లాంటి పరిస్థితులు తనను బాగా భయపెట్టాయని చెప్పాడు.

అయితే అందరూ అదే అభిప్రాయాన్ని వ్యక్తం చేయలేదు. మరో నెటిజన్ మాత్రం ఈ సినిమాపై తీవ్ర అసంతృప్తి వ్యక్తం చేశాడు. “ఇది సమయ వృథా, ఆలోచనా శక్తి వృథా. ఇందులో లోతైన కథేమీ లేదు. మంచి సినిమా అని చెప్పేవాళ్లు అతిగా ఊహించుకుంటున్నారు” అంటూ 0/10 రేటింగ్ ఇచ్చాడు. అతని అభిప్రాయం ప్రకారం సినిమా ఓవర్‌హైప్‌కు గురైందని తెలిపాడు.

మరో సినీ అభిమాని మాత్రం ‘బ్యాక్‌రూమ్స్’ను కొత్త తరహా చిత్ర నిర్మాణానికి నాంది పలికే సినిమాగా కొనియాడాడు. ఈ చిత్రం కేవలం భయపెట్టడమే కాకుండా, మనసులో ఆలోచనలు రేకెత్తిస్తుందని చెప్పాడు. మానవ మేధస్సులోని సంక్లిష్టతలను ప్రతిబింబించేలా కథ సాగుతుందని, మానసిక స్థాయిలో ప్రేక్షకులతో కనెక్ట్ అవుతుందని వివరించాడు. ఈ చిత్రంలోని అసలు భయం దెయ్యాలు లేదా జంప్ స్కేర్స్ వల్ల కాదని, అసౌకర్యాన్ని కలిగించే వాతావరణం వల్లనే ఉత్పన్నమవుతుందని పేర్కొన్నాడు.

ఇంకొకరు సినిమా టెక్నికల్ అంశాలను ప్రశంసించారు. భయానక వాతావరణం, అద్భుతమైన విజువల్స్, సౌండ్ డిజైన్ ప్రేక్షకుడిని మరో ప్రపంచంలోకి తీసుకెళ్తాయని చెప్పారు. బ్యాక్‌రూమ్స్‌లోని ప్రతి తలుపు కొత్త వాస్తవికతను చూపిస్తుందని, కథ చివర్లో ఇచ్చిన ఓపెన్ ఎండింగ్ ప్రేక్షకులలో ఎన్నో సిద్ధాంతాలకు అవకాశం కల్పిస్తుందని అభిప్రాయపడ్డారు.

అయితే కొందరు సినిమా ముగింపుపై తీవ్ర అసంతృప్తి వ్యక్తం చేశారు. కథకు సరైన ముగింపు లేకపోవడం, ఆసక్తికరమైన కాన్సెప్ట్‌ను పూర్తిస్థాయిలో ఉపయోగించుకోలేకపోవడం వల్ల సినిమా నిరాశపరిచిందని పేర్కొన్నారు. మొదటి 50 నిమిషాలు అద్భుతమైన థ్రిల్లర్‌లా అనిపించినా, తర్వాత కథ స్పష్టత కోల్పోయి గందరగోళ హారర్‌గా మారిపోయిందని మరో ప్రేక్షకుడు అభిప్రాయపడ్డాడు. అయితే కలర్ టోన్, విజువల్ ప్రెజెంటేషన్ మాత్రం అత్యుత్తమంగా ఉన్నాయని ప్రశంసించాడు.

‘బ్యాక్‌రూమ్స్’ సినిమా ప్రేక్షకులను రెండు వర్గాలుగా విభజించినట్లు కనిపిస్తోంది. కొందరికి ఇది కొత్త తరహా మానసిక భయానక అనుభవంగా అనిపిస్తే, మరికొందరికి మాత్రం అసంపూర్ణంగా మిగిలిపోయిన ప్రయోగాత్మక చిత్రంగా అనిపించింది. భయాన్ని కొత్త కోణంలో అనుభవించాలనుకునే వారికి ఈ చిత్రం ఆసక్తికరంగా ఉండొచ్చు.