భారత్‌కు చెందిన డిజిటల్ చెల్లింపుల వ్యవస్థ యూపీఐ సేవలు ఇకపై ప్యారిస్ లోని చార్లెస్ డి గల్లె విమానాశ్రయం, నైస్ విమానాశ్రయాల్లో కొద్ది రోజుల్లోనే అందుబాటులోకి రానున్నాయి. దీనివల్ల భారతీయ పర్యాటకులు, విద్యార్థులు, వ్యాపారవేత్తలకు ఎంతో లబ్ధి చేకూరుతుంది. ఇరు దేశాల మధ్య ఆర్థిక భద్రత, సరఫరా గొలుసుల బలోపేతం, కీలక ఖనిజాల లభ్యతపై కొత్తగా చర్చలు ప్రారంభించారు. రక్షణ రంగంలో భారత్ కొనుగోలు చేయాలనుకుంటున్న 114 రాఫెల్ యుద్ధ విమానాల తయారీపై పురోగతి లభించింది. ‘మేక్ ఇన్ ఇండియా’ పద్ధతిలో ఇరు దేశాలు కలిసి ఈ విమానాలను భారతదేశంలోనే డిజైన్, ఉత్పత్తి చేసేలా చర్చలు జరిపారు.

పౌర అణుశక్తి రంగంలో జైతాపూర్ అణు విద్యుత్ ప్రాజెక్టు, అత్యాధునిక చిన్న మోడ్యులర్ రియాక్టర్ సాంకేతికతలపై సమీక్ష జరిపారు. విద్యా రంగంలో కాన్పూర్‌లో ఏరోనాటిక్స్, అనుబంధ రంగాల కోసం ఒక జాతీయ నైపుణ్య కేంద్రాన్ని ఏర్పాటు చేయనున్నారు. ఇది విమానయాన, అంతరిక్ష రంగాల్లో యువతకు ఉపాధి అవకాశాలను మెరుగుపరుస్తుంది. భారత జాతీయ విద్యా విధానం ప్రకారం ఫ్రాన్స్ విశ్వవిద్యాలయాలను భారతదేశంలో క్యాంపస్‌లు ఏర్పాటు చేయాలని పీఎం మోదీ ఆహ్వానించారు. భారత పౌరులకు ఫ్రాన్స్ విమానాశ్రయాల్లో వీసా రహిత రవాణా సౌకర్యాన్ని వేగంగా అమలు చేసినందుకు మోదీ కృతజ్ఞతలు తెలిపారు.

పశ్చిమ ఆసియా ఉద్రిక్తతలు, రష్యా-ఉక్రెయిన్ యుద్ధం వంటి ప్రధాన ప్రపంచ పరిణామాలపై ఇరు దేశాల నేతలు అభిప్రాయాలను పంచుకున్నారు. ప్రపంచ శాంతిని కాపాడటానికి కలిసి పనిచేయాలని నిర్ణయించారు. పెట్టుబడులు, వాణిజ్యంలో కొత్త అవకాశాల కోసం ‘భారత్-యూరోపియన్ యూనియన్ స్వేచ్ఛా వాణిజ్య ఒప్పందాన్ని’ (FTA) వీలైనంత త్వరగా అమలు చేయాలని ఇరుపక్షాలు పిలుపునిచ్చాయి. ఈ పర్యటన ఇరు దేశాల వ్యూహాత్మక భాగస్వామ్యాన్ని మరింత ఉన్నత శిఖరాలకు తీసుకెళ్తుందని నేతలు ఆశాభావం వ్యక్తం చేశారు.