2004లో విడుదలైన ఈ సినిమా అప్పట్లో ఒక పెద్ద ప్రయోగం. ఎలాంటి స్టార్ కాస్ట్ లేకుండా, పూర్తిగా కొత్త వాళ్లతో ఇ.వి.వి ఈ సినిమాను తెరకెక్కించారు. ఆరుగురు వివాహిత మహిళల జీవితాలు, వారి అంతర్గత కోరికలు, భర్తలతో ఉన్న సమస్యలు, సమాజం వారిని చూసే కోణం… ఇలాంటి సున్నితమైన అంశాలను ఇ.వి.వి తనదైన మార్క్ హ్యూమర్ తో, కాస్త బోల్డ్ గా చూపించిన విధానం అప్పట్లో పెద్ద ఎత్తున చర్చకు దారి తీసింది. కొన్ని వర్గాల నుంచి విమర్శలు ఎదురైనప్పటికీ, యూత్ మరియు మాస్ ఆడియన్స్ మాత్రం ఈ చిత్రానికి బ్రహ్మరథం పట్టారు. తక్కువ బడ్జెట్ తో రూపొందిన ఈ చిత్రం బాక్సాఫీస్ వద్ద భారీ లాభాలను ఆర్జించి కమర్షియల్ బ్లాక్ బస్టర్ గా నిలిచింది.

థియేటర్లలోనే కాకుండా, ఆ తర్వాత బుల్లితెరపై కూడా ఈ సినిమా విశేష ఆదరణ పొందింది. టీవీల్లో ఎప్పుడు ప్రసారమైనా మంచి వ్యూయర్‌షిప్ సాధించేది. ఇక ప్రస్తుత డిజిటల్ యుగంలో సోషల్ మీడియా మీమర్స్ కు ఈ సినిమా ఒక కేరాఫ్ అడ్రస్ గా మారిపోయింది. ఇందులోని డైలాగ్స్, క్యారెక్టర్స్, సన్నివేశాల ఆధారంగా ఎన్నో మీమ్స్, స్పూఫ్స్ నిత్యం వైరల్ అవుతూనే ఉంటాయి. ఈ విధంగా రెండు దశాబ్దాల తర్వాత కూడా ఈ సినిమా ఆడియన్స్ కు ఏదో ఒక రూపంలో కనెక్ట్ అయ్యే ఉంది.

మళ్లీ ఇన్నాళ్లకు ఈ కల్ట్ మూవీని సిల్వర్ స్క్రీన్ పై ప్రదర్శించేందుకు సన్నాహాలు జరుగుతున్నాయి. సరికొత్త సాంకేతికతతో డిజిటల్ ప్రింట్ కు (4K వెర్షన్) మార్చి, మెరుగైన ఆడియో క్వాలిటీతో ఈ చిత్రాన్ని నేటి తరం ప్రేక్షకుల ముందుకు తీసుకురానున్నారు. అప్పట్లో ట్రెండ్ సెట్ చేసిన ఈ బోల్డ్ కంటెంట్, ఇవాల్టి జెనరేషన్ ప్రేక్షకులను థియేటర్లలో ఏ మేర మెప్పిస్తుందో చూడాలి. త్వరలోనే ఈ రీ-రిలీజ్ డేట్ పై మేకర్స్ నుంచి అధికారిక ప్రకటన రానుంది.