పోలీసుల వివరాల ప్రకారం.. రాజస్థాన్‌లోని ప్రతాప్ నగర్ పరిధిలోని రవీంద్రనగర్‌కు చెందిన సీరత్ శర్మ (45) భర్త ఏడాది క్రితం మరణించారు. దీంతో ప్రభుత్వ నిబంధనల ప్రకారం.. ఆమెకు కోర్టులో కారుణ్య నియామకం కింద లోయర్ డివిజన్ క్లర్క్ (LDC)గా ఉద్యోగం లభించింది. అయితే, ఆ ప్రభుత్వ ఉద్యోగం తల్లికి కాకుండా తనకు దక్కాలని ఆమె కుమార్తె ఆయుషి ఆశపడింది. ఈ విషయమై తల్లిని ఒప్పించే ప్రయత్నం చేయగా, అందుకు సీరత్ శర్మ నిరాకరించారు. దీంతో తల్లిపై ఆయుషి తీవ్ర ఆగ్రహం పెంచుకుంది.

ఉద్యోగంతో పాటు కుటుంబ ఆస్తి మొత్తం తనకే దక్కాలనే దురాశతో ఆయుషి తన కన్నతల్లిని వదిలించుకోవాలని పథకం వేసింది. ఈ క్రమంలో ఆమె తన సమీప బంధువులైన ఆరుగురితో కలిసి తల్లిని హతమార్చడానికి కుట్ర పన్నింది. ఈ నెల 2వ తేదీన ప్రణాళిక ప్రకారం సీరత్ శర్మను కారుతో బలంగా ఢీకొట్టించి చంపేశారు. పైకి ఇదొక సాధారణ రోడ్డు ప్రమాదంలా కనిపించేలా నిందితులు డ్రామా ఆడారు.

సీరత్ శర్మ మృతిపై ఆమె సోదరుడు రాజేష్‌కు అనుమానం రావడంతో ఆయన పోలీసులకు ఫిర్యాదు చేశారు. కేసు నమోదు చేసుకుని లోతుగా దర్యాప్తు చేపట్టిన పోలీసులకు ఆయుషి ప్రవర్తనపై అనుమానం వచ్చింది. విచారణలో ఆయుషి తన బంధువులతో కలిసి చేసిన హత్యోదంతం మొత్తం బయటపడింది.