Last Updated:
ప్రధాని నరేంద్ర మోదీకి ఝాల్ముడి తినిపించిన విక్రమ్ సాహు కు పాకిస్థాన్, బంగ్లాదేశ్ నంబర్ల నుంచి బాంబు బెదిరింపులు, అసభ్య కాల్స్, పోలీసులు రక్షణ కల్పించి దర్యాప్తు చేస్తున్నారు.
పశ్చిమ బెంగాల్ అసెంబ్లీ ఎన్నికల ప్రచారంలో ప్రధానమంత్రి నరేంద్ర మోదీకి తన చేతులతో ‘ఝాల్ముడి’ (మరమరాల మిశ్రమం) తినిపించిన ఒక స్థానిక చిన్న వ్యాపారికి ఇప్పుడు అంతర్జాతీయ నంబర్ల నుండి ప్రాణాపాయ బెదిరింపులు వస్తున్నాయి. ఝార్గ్రామ్ ప్రాంతానికి చెందిన విక్రమ్ సాహు అనే ఈ వ్యాపారికి పాకిస్థాన్, బంగ్లాదేశ్ దేశాల నుండి వరుసగా ఫోన్ కాల్స్, వాట్సాప్ వీడియో కాల్స్ వస్తున్నట్లు న్యూస్18 హిందీ కథనం పేర్కొంది. తనను, తన కుటుంబాన్ని బాంబులతో పేల్చివేస్తామని గుర్తుతెలియని వ్యక్తులు హెచ్చరిస్తున్నారని బాధితుడు ఆవేదన వ్యక్తం చేశాడు. ప్రధాని మోదీతో దిగిన ఫోటోలు, వీడియోలు సోషల్ మీడియాలో వైరల్ కావడంతో రాత్రికి రాత్రే వచ్చిన గుర్తింపు ఇప్పుడు ఆ కుటుంబానికి పెద్ద భయంగా మారింది. బెదిరింపుదారులు ఫోన్ చేసి అసభ్య పదజాలంతో దూషిస్తున్నారని, బంగ్లాదేశ్ నుండి ఫోన్ చేసి ‘నువ్వు ఇంకా బతికే ఉన్నావా?’ అంటూ వేధిస్తున్నారని విక్రమ్ సాహు ఆరోపించాడు.
గత ఏప్రిల్ 19న ఝార్గ్రామ్లో జరిగిన భారీ ఎన్నికల ప్రచార సభకు ప్రధానమంత్రి నరేంద్ర మోదీ హాజరయ్యారు. ర్యాలీ ముగించుకుని తిరిగి వెళ్తుండగా, ప్రధాని కాన్వాయ్ అకస్మాత్తుగా రోడ్డు పక్కన ఉన్న విక్రమ్ సాహు దుకాణం వద్ద ఆగింది. పీఎం మోదీ ఎంతో ఇష్టంగా ఆయన తయారు చేసిన ఝాల్ముడిని తిని, కాసేపు మాట్లాడారు. ఈ అరుదైన సంఘటనతో విక్రమ్ దుకాణానికి ఒక్కసారిగా కస్టమర్ల రద్దీ పెరిగింది.
అయితే ఈ ప్రజాదరణే ఇప్పుడు ఆయనకు శాపంగా మారింది. గత కొన్ని రోజులుగా అంతర్జాతీయ కోడ్లతో ఉన్న నంబర్ల నుండి నిరంతరం వస్తున్న కాల్స్ వల్ల విక్రమ్ సాహు కుటుంబం తీవ్ర ఆందోళనలో మునిగిపోయింది. గుర్తుతెలియని నంబర్ల నుండి వస్తున్న ఈ బెదిరింపులపై బాధితుడు ఇప్పటికే స్థానిక పోలీసులకు లిఖితపూర్వకంగా ఫిర్యాదు చేశాడు.
ఈ ఘటన స్థానికంగా తీవ్ర సంచలనం సృష్టించడంతో పశ్చిమ బెంగాల్ పోలీసులు దీనిని సీరియస్గా తీసుకున్నారు. విక్రమ్ సాహు నివాసానికి, దుకాణానికి తాత్కాలికంగా రక్షణ కల్పించారు. సైబర్ క్రైమ్ విభాగం సహాయంతో ఆయా అంతర్జాతీయ ఫోన్ నంబర్ల మూలాలను, వాటి వెనుక ఉన్న నిందితులను గుర్తించడానికి పోలీసులు ముమ్మరంగా దర్యాప్తు జరుపుతున్నారు.
Click here to add News18 as your preferred news source on Google. బ్రేకింగ్ న్యూస్, రాజకీయాలు, దేశంలోని అన్ని రాష్ట్రాల్లోని ముఖ్యమైన వార్తలు, విశ్లేషణ, కేంద్ర ప్రభుత్వ పథకాలకు సంబంధించిన స్టోరీలను న్యూస్18 తెలుగు నేషనల్ కేటగిరీలో చదవండి. మరిన్ని వార్తల కోసం న్యూస్ 18 తెలుగు ఫాలో అవండి.
Hyderabad,Telangana
