“ఒకసారి విద్యా, ఆర్థిక సాధికారత సాధించాక సమాజంలో వారి స్థాయి మారుతుంది. ఆ తర్వాత కూడా తదుపరి తరాల పిల్లల కోసం రిజర్వేషన్లు కోరుతూ పోతే, ఈ వ్యవస్థ నుంచి మనం ఎప్పటికీ బయటపడలేము. ఈ వాస్తవాన్ని మనం కచ్చితంగా పరిగణనలోకి తీసుకోవాలి.” అని సుప్రీంకోర్టు ధర్మాసనం వెల్లడించింది.

ఇప్పటికే పలు ప్రభుత్వ ఉత్తర్వులు క్రీమీ లేయర్ పరిధిలోకి వచ్చే ఉన్నత వర్గాలను రిజర్వేషన్ల నుంచి మినహాయిస్తున్నాయని, అయితే ఆ మినహాయింపులను కూడా ఇప్పుడు కోర్టుల్లో సవాలు చేయడంపై ధర్మాసనం ఆశ్చర్యం వ్యక్తం చేసింది. సమాజంలో ముందడుగు వేసిన వర్గాలను మినహాయించడం సముచితమేనని, ఈ విషయాన్ని పిటిషనర్లు గుర్తుంచుకోవాలని సూచించింది. రిజర్వేషన్ల ద్వారా ఒక తరం లబ్ధి పొంది సమాజంలో ఒక నిర్దిష్ట స్థాయికి చేరుకున్నాక, తర్వాతి తరానికి ఆ అర్హతను కొనసాగించాలా వద్దా అనే అంశంపై పునఃపరిశీలన అవసరమని కోర్టు అభిప్రాయపడింది.

సమతుల్యత: సామాజికంగా, విద్యాపరంగా నిజమైన వెనుకబాటుతనాన్ని ఎదుర్కొంటున్న వారికి రిజర్వేషన్లు అందాలి.

స్వచ్ఛందంగా తప్పుకోవడం: తల్లిదండ్రులు మంచి ఉద్యోగాల్లో ఉండి, తగినంత ఆదాయం పొందుతున్నప్పుడు.. వారి పిల్లలు రిజర్వేషన్ల పరిధి నుంచి బయటకు రావాల్సిన సమయం ఆసన్నమైందని జస్టిస్ నాగరత్న వ్యాఖ్యానించారు.