Last Updated:
ఇరాన్ అణు కార్యక్రమంపై అమెరికాతో తీవ్ర విభేదాలు ఉన్నప్పటికీ, కొత్త యుద్ధాన్ని నిరోధించేందుకు ఇరు దేశాల మధ్య పరోక్ష చర్చలు జరుగుతున్నాయి. తుది ఒప్పందం కోసం ముసాయిదా పత్రాలను మార్చుకుంటూ దౌత్య ప్రయత్నాలు ముమ్మరం చేశారు.
అమెరికా, ఇరాన్ దేశాల మధ్య మరోసారి యుద్ధం జరగకుండా రెండు వైపులా తీవ్రమైన పరోక్ష చర్చలు జరుగుతున్నాయి. ఇరాన్ అణు కార్యక్రమంపై ఇరు దేశాల మధ్య తీవ్ర విభేదాలు కొనసాగుతున్నప్పటికీ, తుది ఒప్పందాన్ని రూపొందించేందుకు రాయబారాలు సాగుతున్నట్లు ‘న్యూయార్క్ టైమ్స్’ ఒక కథనంలో వెల్లడించింది. ఇరాన్, ఇజ్రాయెల్ దేశాల మధ్య ప్రస్తుతం తాత్కాలిక కాల్పుల విరమణ అమల్లో ఉన్నప్పటికీ.. ఈ దౌత్య ప్రయత్నాలు ఫలిస్తాయా లేదా మళ్లీ ఉద్రిక్తతలు పెరుగుతాయా అనే ఉత్కంఠ నెలకొంది. ఇరు దేశాల మధ్య తీవ్ర అపనమ్మకం ఉన్నందున చర్చల ముసాయిదా పత్రాలు, సందేశాల మార్పిడి పరోక్షంగానే సాగుతోంది. పాకిస్తాన్ ఈ చర్చల్లో మధ్యవర్తిగా కీలక పాత్ర పోషిస్తోంది.
ఈ చర్చల్లో ఇరాన్ వద్ద ఉన్న యురేనియం నిల్వలు ప్రధాన అడ్డంకిగా మారాయి. ఇరాన్ తన వద్ద ఉన్న సుసంపన్నమైన యురేనియంను విదేశాలకు పంపేందుకు ఏమాత్రం సిద్ధంగా లేదని, తన మొండి పట్టుదలను వీడటం లేదని తెలుస్తోంది. అయితే అణ్వాయుధాల తయారీకి ఉపయోగపడే యురేనియం నిల్వలను ఇరాన్ ఉంచుకోవడానికి వీల్లేదని అమెరికా గట్టిగా డిమాండ్ చేస్తోంది.
అమెరికా అధ్యక్షుడు డొనాల్డ్ ట్రంప్ ఇటీవల మాట్లాడుతూ.. ఆయుధాల అభివృద్ధికి ఉపయోగపడేలా ఇరాన్ యురేనియంను సమకూర్చుకోవడాన్ని తాము ఎట్టిపరిస్థితుల్లోనూ అనుమతించబోమని స్పష్టం చేశారు. ఎలాగైనా ఆ నిల్వలను అడ్డుకుంటామని ట్రంప్ హెచ్చరించారు. మరోవైపు అమెరికా వ్యూహాలపై ఇరాన్ నాయకత్వం తీవ్ర అనుమానాలు వ్యక్తం చేస్తోంది. కాల్పుల విరమణ సమయాన్ని ఉపయోగించుకుని అమెరికా తన సైనిక శక్తులను పునర్వ్యవస్థీకరించి, మళ్లీ దాడులకు దిగవచ్చని టెహ్రాన్ భయపడుతోంది.
ఇరాన్ ప్రధాన చర్చల ప్రతినిధి మహ్మద్ బాఖర్ ఖాలిబాఫ్ మాట్లాడుతూ.. శత్రువుల బహిరంగ, రహస్య కదలికలను గమనిస్తే అమెరికా భవిష్యత్తులో దాడులకు సిద్ధమవుతున్నట్లు అనుమానంగా ఉందన్నారు. ఇన్ని ఉద్రిక్తతలు ఉన్నప్పటికీ అణు ఆంక్షల సడలింపు, ప్రాంతీయ భద్రత వంటి అంశాలపై ఒక అవగాహనకు వచ్చేందుకు ఇరు దేశాలు ప్రయత్నిస్తున్నాయి. యురేనియం నిల్వలు, భద్రతా హామీలపై స్పష్టత వస్తేనే ఈ దౌత్య చర్చలు సఫలమవుతాయని విశ్లేషకులు భావిస్తున్నారు.
Click here to add News18 as your preferred news source on Google. బ్రేకింగ్ న్యూస్, రాజకీయాలు, దేశంలోని అన్ని రాష్ట్రాల్లోని ముఖ్యమైన వార్తలు, విశ్లేషణ, కేంద్ర ప్రభుత్వ పథకాలకు సంబంధించిన స్టోరీలను న్యూస్18 తెలుగు నేషనల్ కేటగిరీలో చదవండి. మరిన్ని వార్తల కోసం న్యూస్ 18 తెలుగు ఫాలో అవండి.
Hyderabad,Telangana
