ఫైనల్ మ్యాచ్ ఆరంభం నుంచే భారత క్రీడాకారిణులు అద్భుతమైన గురితో ప్రత్యర్థిపై ఒత్తిడి పెంచారు. వరుసగా పర్ఫెక్ట్ 10లను సంధిస్తూ తొలి ఎండ్‌ను 60-58తో కైవసం చేసుకున్నారు. అదే జోరును కొనసాగిస్తూ రెండో ఎండ్‌ను కూడా 60-58తో గెలుచుకుని తమ ఆధిక్యాన్ని పెంచుకున్నారు. మూడో రౌండ్ ముగిసే సమయానికి 178-176తో భారత్ ఆధిక్యంలో నిలిచింది.

చివరిదైన నాలుగో ఎండ్‌లో ఒత్తిడికి లోనైన చైనా రెండు బాణాలను 9 పాయింట్లకు మాత్రమే సంధించింది. మరోవైపు భారత ఆర్చర్లు ఏమాత్రం తడబడకుండా వరుసగా ఆరు బాణాలను పర్ఫెక్ట్ 10లకు గురిపెట్టి ప్రపంచ రికార్డును సమం చేయడంతో పాటు ఛాంపియన్ టైటిల్‌ను నిలబెట్టుకున్నారు.

నగోయాలోని ఒకజాకి చువో సొగో పార్క్‌లో జరిగిన ఉత్కంఠభరిత సెమీఫైనల్లో దక్షిణ కొరియాపై 234-233 తేడాతో విజయం సాధించి భారత్ ఫైనల్‌‌కు చేరుకుంది. అంతకుముందు 2023లో జరిగిన హాంగ్జౌ ఆసియా క్రీడల్లోనూ భారత మహిళల కాంపౌండ్ జట్టు స్వర్ణం సాధించగా, ఆ ఎడిషన్‌లో ఆర్చరీ విభాగంలో భారత్‌కు మొత్తం ఐదు స్వర్ణాలు దక్కాయి. తాజా విజయంతో ప్రస్తుత ఆసియా క్రీడల్లో భారత ఖాతాలో ఏడో స్వర్ణ పతకం చేరింది.