సెమీఫైనల్ మ్యాచ్ ముగిసిన తర్వాత పతకం రంగు మారడంతో సుచికా కన్నీరుమున్నీరుగా విలపించింది. పోరాటంలో తాను వంద శాతం శ్రమించానని, ఈ మ్యాచ్‌లో తానే గెలిచానని భావించినట్లు మ్యాచ్ అనంతరం ఆమె ఆవేదన వ్యక్తం చేసింది. అయితే రిఫరీ నిర్ణయం తనకు ఏమాత్రం న్యాయంగా అనిపించలేదని, ఫైనల్ ఫలితాన్ని తాను అంగీకరించలేకపోతున్నానని సుచికా కన్నీళ్లు పెట్టుకుంది. పాయింట్ల పట్టిక బోర్డుపై కనిపించగానే సుచికా తీవ్ర నిరాశకు గురైంది. రిఫరీ విజేత చేతిని పైకెత్తేందుకు పిలిచినా ఆమె దూరంగానే ఉండిపోయింది. సింగపూర్ ఫైటర్ చేయి పైకెత్తగానే సుచికా మోకాళ్లపై కుప్పకూలిపోయింది. కోచ్‌లు ఆమెను ఓదార్చాల్సి వచ్చింది. ఆ తర్వాత కాస్త స్థిమితపడి జాతీయ జెండా కప్పుకుని మైదానంలో గౌరవ వందనం చేసింది.

మ్యాచ్ ఆరంభంలో సింగపూర్ క్రీడాకారిణి టియోకు అనుకూలంగా తీర్పు వచ్చింది. అయితే ఈ నిర్ణయాన్ని భారత బృందం సవాల్ చేసింది. వెయ్యి డాలర్ల ఫీజు చెల్లించి మళ్లీ రివ్యూ కోరడంతో మరో ముగ్గురు కొత్త జడ్జీలను ప్యానెల్‌లో చేర్చారు. ఆరుగురు జడ్జీలు పరిశీలించిన తర్వాత మ్యాచ్‌ను డ్రాగా ప్రకటించారు. ఇక్కడే ఇంటర్నేషనల్ మిక్స్‌డ్ మార్షల్ ఆర్ట్స్ ఫెడరేషన్ (IMMAF) నిబంధనలు కీలకంగా మారాయి. మ్యాచ్ డ్రా అయినప్పుడు ఉదయం తీసుకున్న బరువును పరిగణనలోకి తీసుకుని విజేతను నిర్ణయిస్తారు. సింగపూర్ ఫైటర్ బరువు సుచికా కంటే 700 గ్రాములు తక్కువగా ఉండటంతో ఆమెను విజేతగా ప్రకటించి ఫైనల్‌కు పంపించారు. నిబంధనలే సుచికాకు ఫైనల్ అవకాశాన్ని దూరం చేశాయి.