వరదల్లో మరణించిన వారి కుటుంబాలకు ఇచ్చే పరిహారాన్ని రూ.9 లక్షలకు పెంచుతున్నట్లు ముఖ్యమంత్రి హిమంత బిశ్వ శర్మ ప్రకటించినట్లు న్యూస్18 ఇంగ్లీష్ కథనం పేర్కొంది. గతంలో ఉన్న రూ.4 లక్షల పరిహారానికి అదనంగా ముఖ్యమంత్రి సహాయ నిధి నుంచి రూ.5 లక్షలు కలిపి ఈ మొత్తం అందించనున్నారు. పరిహారం పొందేందుకు పోస్టుమార్టం నివేదిక నిబంధనను కూడా ప్రభుత్వం సడలించింది.

వరదల్లో కొట్టుకుపోయి నెల రోజులుగా లభించని వారి కుటుంబాలకు కూడా సర్కిల్ ఆఫీసర్ ధృవీకరణ ఆధారంగా రూ.9 లక్షల పరిహారం వర్తింపజేస్తారు. అత్యంత దారుణంగా దెబ్బతిన్న శివసాగర్, చరాయిదేవ్, జోర్హాట్, గోలాఘాట్ జిల్లాల్లోని కుటుంబాలకు తక్షణ గృహ అవసరాల కోసం రూ.15,000 తాత్కాలిక ఆర్థిక సాయం అందించనున్నట్లు ప్రభుత్వం తెలిపింది. అత్యధికంగా చరాయిదేవ్‌లో 1.42 లక్షల మంది, శివసాగర్‌లో 97 వేల మంది, జోర్హాట్‌లో 57 వేల మంది తీవ్ర ఇబ్బందులు పడుతున్నారు. మొత్తం 21 రెవెన్యూ సర్కిళ్లు, 622 గ్రామాలు వరద నీటిలోనే చిక్కుకున్నాయి.

ప్రభావిత ప్రాంతాల్లో ఆర్మీ, ఎయిర్ ఫోర్స్, ఎన్డీఆర్‌ఎఫ్, ఎస్‌డీఆర్‌ఎఫ్ బృందాలు ముమ్మరంగా సహాయక చర్యలు చేపడుతున్నాయి. బాధితుల కోసం ఏర్పాటు చేసిన 81 రీలీఫ్ క్యాంపుల్లో ప్రస్తుతం 32,477 మంది తలదాచుకుంటున్నారు. మరో 34 సహాయ పంపిణీ కేంద్రాల ద్వారా ఆహార ధాన్యాలు, తాగునీరు, ఔషధాలు, టార్పాలిన్లు, పాలు, ఇతర నిత్యావసర సరుకులను పంపిణీ చేస్తున్నారు. ఎక్కడా ఎలాంటి ప్రాణనష్టం జరగకుండా అధికారులు నిరంతరం పర్యవేక్షిస్తున్నారు.

వరద నీరు ఇంకా తగ్గకపోవడంతో వ్యవసాయ రంగం తీవ్రంగా దెబ్బతింది. రాష్ట్రవ్యాప్తంగా దాదాపు 45,341 హెక్టార్లలో పంట పొలాలు ఇప్పటికీ నీటమునిగే ఉన్నాయి. అనేక ఇళ్లు, పాఠశాలలు, అంగన్‌వాడీ కేంద్రాలు, పశువుల పాకలు ధ్వంసమయ్యాయి. నుమలీగఢ్ వద్ద ధన్‌సిరి నది ప్రమాద హెచ్చరిక స్థాయికి మించి ప్రవహిస్తోంది. అయితే ప్రధాన నదులేవీ గరిష్ట వరద స్థాయిని దాటలేదని అధికారులు వెల్లడించారు. బాధితులకు అన్ని విధాలా అండగా ఉంటామని ప్రభుత్వం హామీ ఇచ్చింది.