తన ఆశలను కూతురి ద్వారా నెరవేర్చుకోవాలని భావించిన దీపక్.. జ్ఞానేశ్వరికి 13 ఏళ్ల వయసులోనే వెయిట్‌లిఫ్టింగ్ శిక్షణ ఇప్పించాడు. ఎలక్ట్రీషియన్‌గా పనిచేస్తున్న అతను తన కూతురిలోని ప్రతిభను గుర్తించి కోచ్ అజయ్ లోహర్ విశ్వకర్మ వద్ద చేర్చాడు. వారి ప్రోత్సాహం, తన కఠోర శ్రమతో జ్ఞానేశ్వరి అంచలంచెలుగా ఎదిగి ఈరోజు కామన్వెల్త్ పోడియంపై నిలిచింది.

అయితే ఈ అద్భుత విజయానికి ముందు ఆమె పడిన శారీరక బాధ అంతాఇంతా కాదు. న్యూస్18 ఇంగ్లీష్ కథనం ప్రకారం.. పోటీ ముగిసిన తర్వాత జ్ఞానేశ్వరి మాట్లాడుతూ.. తనకు అది నెలసరి మొదటి రోజు అని చెప్పింది. “ఈరోజు నాకు పీరియడ్స్ మొదలయ్యాయి. నా శరీరం సహకరిస్తుందో లేదో అని చాలా భయపడ్డాను. కానీ నా వంతు శ్రమంతా ధారపోశాను” అని ఆమె వివరించింది. ఇలాంటి కష్ట సమయంలోనూ ఆమె తన కెరీర్‌లోనే అత్యుత్తమ ప్రదర్శన కనబరచడం విశేషం.