Last Updated:
Chandra Babu: దక్షిణాది రాష్ట్రాల చిరకాల వాంఛ, సమగ్ర ప్రగతికి చోదక శక్తిగా మారే గోదావరి-కావేరి నదుల అనుసంధాన ప్రక్రియను వేగవంతం చేయాలని ఆంధ్రప్రదేశ్ ముఖ్యమంత్రి నారా చంద్రబాబు నాయుడు కేంద్ర ప్రభుత్వాన్ని కోరారు.
దేశ రాజధాని దిల్లీ పర్యటనలో భాగంగా ఆయన ప్రధానమంత్రి నరేంద్ర మోదీతో దాదాపు గంటన్నర పాటు విస్తృతంగా సమావేశమయ్యారు. రాష్ట్రానికి సంబంధించిన కీలక అభివృద్ధి ప్రాజెక్టులు, విభజన హామీలు, ఆర్థిక స్థితిగతులతో పాటు దక్షిణాది రాష్ట్రాల మధ్య జల వివాదాలను శాశ్వతంగా పరిష్కరించే బృహత్తర గోదావరి-కావేరి అనుసంధానంపై ప్రధానంగా చర్చించారు.
సమావేశం అనంతరం వెల్లడైన వివరాల ప్రకారం, నదుల అనుసంధానం వల్ల దక్షిణాది ప్రాంతంలో సమూల మార్పులు వస్తాయని చంద్రబాబు వివరించారు. గోదావరి నది నుంచి సముద్రంలోకి వృథాగా పోయే మిగులు జలాలను కృష్ణా, పెన్నా మీదుగా కావేరి బేసిన్‌కు మళ్లించడం ద్వారా ఆంధ్రప్రదేశ్, తెలంగాణ, కర్ణాటక, తమిళనాడు రాష్ట్రాలకు అపారమైన ప్రయోజనం చేకూరుతుంది. ప్రతి ఏటా నీటి పంపకాల విషయంలో రాష్ట్రాల మధ్య తలెత్తే తీవ్ర వివాదాలు, న్యాయపోరాటాలు, జల యుద్ధాలకు ఈ ప్రాజెక్టు ద్వారా శాశ్వత పరిష్కారం లభిస్తుందని ప్రధానికి వివరించారు. నీటి సమస్యలు సమసిపోతే రాష్ట్రాలన్నీ పరస్పర ఘర్షణలు వీడి, పారిశ్రామిక, వ్యవసాయ ప్రగతిపై పూర్తి దృష్టి సారించే వాతావరణం ఏర్పడుతుందని పేర్కొన్నారు.
భారతదేశాన్ని వికసిత భారత్‌గా తీర్చిదిద్దే సంకల్పంలో దక్షిణాది రాష్ట్రాలు బలమైన ‘గ్రోత్ ఇంజిన్’లుగా మారగలవని ముఖ్యమంత్రి స్పష్టం చేశారు. వ్యవసాయ రంగానికి సమృద్ధిగా సాగునీరు, వేగంగా విస్తరిస్తున్న నగరాలకు తాగునీరు, పరిశ్రమలకు అవసరమైన నీటి వనరులు సమకూరితే ఉత్పత్తి సామర్థ్యం గణనీయంగా పెరుగుతుంది. గతంలో ఎన్డీయే ప్రభుత్వాల హయాంలో దేశవ్యాప్తంగా నిర్మించిన జాతీయ రహదారుల నెట్‌వర్క్ (స్వర్ణ చతుర్భుజి), అంతర్రాష్ట్ర విద్యుత్ పవర్ గ్రిడ్ తరహాలోనే ఇప్పుడు దేశవ్యాప్త ‘వాటర్ గ్రిడ్’ నిర్మాణం అత్యవసరమని సూచించారు. గోదావరి-కావేరి నదుల కలయిక దేశంలోనే అతిపెద్ద నీటి భద్రతా చొరవగా నిలుస్తుందని, ఇది జాతీయ వాటర్ గ్రిడ్ ఏర్పాటుకు మార్గం సుగమం చేస్తుందని అభిప్రాయపడ్డారు.
గోదావరి జలాల సంపూర్ణ వినియోగానికి రాష్ట్ర జీవనాడి అయిన పోలవరం ప్రాజెక్టు పూర్తవ్వడం అత్యంత కీలకమని చంద్రబాబు తెలిపారు. పోలవరం ప్రాజెక్టు తాజా నిర్మాణ పురోగతిపై ప్రధానికి సమగ్ర నివేదిక సమర్పించారు. డ్యామ్‌లో పూర్తిస్థాయి నీటి నిల్వను సాధించేందుకు, నిర్వాసితులకు పునరావాసం కల్పించేందుకు కేంద్రం తక్షణమే అవసరమైన ఆర్థిక వనరులను విడుదల చేయాలని అభ్యర్థించారు. పోలవరం ద్వారానే గోదావరి వరద జలాలను సమర్థవంతంగా ఒడిసిపట్టి దిగువకు తరలించడం సాధ్యమవుతుందని ప్రధానికి వివరించారు.
2027లో రానున్న గోదావరి మహా పుష్కరాలకు లక్షలాది మంది భక్తులు తరలివచ్చే అవకాశమున్నందున, గోదావరి పరివాహక ప్రాంతాల్లో అవసరమైన మౌలిక వసతులు, రహదారులు, అభివృద్ధి పనులకు ప్రత్యేక ఆర్థిక సాయం అందించాలని కోరారు. దీంతో పాటు విశాఖపట్నం మెట్రో రైలు ప్రాజెక్టుకు తుది ఆమోదం తెలపాలని, రాజధాని అమరావతి అవుటర్ రింగ్ రోడ్డు (ఓఆర్‌ఆర్) నిర్మాణానికి కేంద్రం సంపూర్ణ మద్దతు ఇవ్వాలని విన్నవించారు. ఈ పర్యటనలో భాగంగా చంద్రబాబు పలువురు కేంద్ర మంత్రులతో కూడా సమావేశమై రాష్ట్రానికి సంబంధించిన పెండింగ్ ప్రాజెక్టులపై చర్చలు జరిపారు.
