ఈ సదస్సులో కాలేయ సంబంధిత వ్యాధులు, వాటి నివారణ, ఆధునిక చికిత్సలపై ప్రత్యేకంగా చర్చించారు. జీవనశైలి మార్పుల వల్ల పెరుగుతున్న కాలేయ సమస్యలను అడ్డుకోవడానికి అంతర్జాతీయ పరిశోధనలు ఎంతగానో అవసరమని ప్రతినిధులు అభిప్రాయపడ్డారు. ఈజిప్ట్, అమెరికా దేశాలకు చెందిన కాలేయ మండళ్ల ప్రతినిధులతో కామన్వెల్త్ వైద్య నిపుణులు సమావేశమయ్యారు. కాలేయ వ్యాధుల ప్రారంభ దశ గుర్తింపు, అధునాతన మందుల లభ్యతపై ఉమ్మడి వ్యూహాలను రూపొందించారు.

సభ్య దేశాల ప్రజలకు ప్రత్యక్ష ప్రయోజనం చేకూర్చే దిశగా పలు అంతర్జాతీయ వైద్య పరిశోధన సంస్థలతో కీలక అవగాహన ఒప్పందాలు కుదిరాయి. ఈ ఒప్పందాల ప్రకారం రాబోయే రోజుల్లో వైద్యులకు అధునాతన శిక్షణ ఇవ్వడం, ప్రయోగశాలల నాలెడ్జ్ షేరింగ్, నూతన చికిత్సా పద్ధతులను వేగంగా విస్తరించడం జరుగుతుంది. కణజాల పునరుత్పత్తి ప్రక్రియల్లో వస్తున్న నూతన ఆవిష్కరణలను పేద దేశాలకు సైతం తక్కువ ఖర్చుతో చేర్చడమే ఈ ఒప్పందాల ముఖ్య ఉద్దేశం.

ఉదయం ఎనిమిది గంటల నుంచి సాయంత్రం నాలుగు గంటల వరకు సాగిన ఈ మహాసభలో 56 కామన్వెల్త్ దేశాల్లో వైద్య రంగ బలోపేతానికి అవసరమైన నిధుల సేకరణపై దృష్టి సారించారు. వెనుకబడిన ప్రాంతాల్లో ఆధునిక పరిశోధనా కేంద్రాల స్థాపనకు అవసరమైన అంతర్జాతీయ ఆర్థిక సాయం, సాంకేతిక తోడ్పాటుపై ప్రతినిధులు లోతుగా విశ్లేషించారు. ప్రపంచ బ్యాంకు, ఇతర స్వచ్ఛంద సంస్థల భాగస్వామ్యాన్ని ఆహ్వానించాలని నిర్ణయించారు.

ఈ కార్యక్రమంలో కామన్వెల్త్ సెక్రటేరియట్ సీనియర్ డైరెక్టర్ సురేష్ యాదవ్, కజకిస్తాన్ రాయబార కార్యాలయ ప్రతినిధి మీర్ నవాబ్ అలీ ప్రత్యేక అతిథులుగా హాజరయ్యారు. వీరితో పాటు క్రిస్ పౌలస్, రెజీనా, కామెల్ అయ్దిన్, హోర్లే వంటి అంతర్జాతీయ నిపుణులు పాల్గొన్నారు. భారతీయ వైద్య ప్రముఖులు డాక్టర్ రాజేష్, డాక్టర్ శివప్రకాశన్, డాక్టర్ సుమతి లక్ష్మి, పూర్వ అధ్యక్షుడు డాక్టర్ మురుగరాజ్, అరుల్ రాజ్ తమ విలువైన సలహాలను అందించారు.

కేవలం జీవించే కాల పరిమితిని పెంచడం మాత్రమే కాకుండా, పూర్తి ఆరోగ్యంతో కూడిన నాణ్యమైన జీవనాన్ని అందించడమే తమ ఉద్దేశమని డాక్టర్ ప్రభు కుమార్ చల్లగాలి స్పష్టం చేశారు. ఆధునిక విజ్ఞానం ప్రతి ఒక్కరి దరికి చేరినప్పుడే మానవాళికి నిజమైన ప్రయోజనం కలుగుతుందన్నారు. కార్యక్రమాన్ని విజయవంతం చేసిన 56 దేశాల వైద్యులకు, వివిధ సంస్థల ప్రతినిధులకు ఆయన కృతజ్ఞతలు తెలియజేశారు.