శనివారం విమానాశ్రయంలో చోటుచేసుకున్న పరిణామాలు తీవ్ర చర్చనీయాంశమయ్యాయి. ముంబై నుంచి వచ్చిన ఎయిర్ ఇండియా విమానం ఢిల్లీలో దిగగానే, మహిళా సిబ్బందితో కూడిన ఢిల్లీ పోలీసు బృందం నేరుగా విమానంలోకి ప్రవేశించి ఈ ముగ్గురు నాయకులను అదుపులోకి తీసుకునేందుకు యత్నించింది. ఆ సమయంలో తోటి ప్రయాణికుల ముందే పోలీసులతో వాగ్వాదం జరిగింది. “నేను అరెస్ట్ కావడానికే ఢిల్లీ వచ్చాను” అని అభిజీత్ దిప్కే పోలీసు అధికారులతో అనడం తాలూకు వీడియోలు సామాజిక మాధ్యమాల్లో వైరల్‌గా మారాయి. ఓటర్ల జాబితాలో అక్రమాలు జరిగాయని ఆరోపిస్తూ, సీఈసీ జ్ఞానేష్ కుమార్ రాజీనామా డిమాండ్‌తో జంతర్ మంతర్ వద్ద సీజేపీ తలపెట్టిన నిరసనకు ఢిల్లీ పోలీసులు భద్రత, శాంతిభద్రతల దృష్ట్యా అనుమతి నిరాకరించారు. ఈ నేపథ్యంలోనే ముందస్తు అరెస్టులు చేపట్టారు.

ఈ నిరసనకు ముందే గురుగ్రామ్‌లోని తన నివాసంలో అదుపులోకి తీసుకున్న ప్రముఖ యూట్యూబర్, ఇన్‌ఫ్లుయెన్సర్ ధ్రువ్ రాఠీని సైతం ఆదివారం తెల్లవారుజామున 3 గంటల ప్రాంతంలో పోలీసులు విడుదల చేశారు. రాజధానిలో భారీ ఆందోళనలు జరగకుండా నిరోధించేందుకు పోలీసులు విస్తృత స్థాయిలో చేపట్టిన ముందస్తు చర్యల్లో భాగంగానే ఈ నిర్బంధాలు జరిగాయి.

నాయకుల నిర్బంధాలు కొనసాగినప్పటికీ, సీఈసీ రాజీనామా డిమాండ్‌పై వెనక్కి తగ్గేది లేదని సీజేపీ స్పష్టం చేసింది. ఆదివారం ఉదయం 10 గంటలకు జంతర్ మంతర్ వద్ద భారీ నిరసన ప్రదర్శన చేపట్టాలని తమ శ్రేణులకు కొత్తగా పిలుపునిచ్చింది. ఓటర్ల జాబితాలోని అవకతవకలకు వ్యతిరేకంగా ఆల్ ఇండియా స్టూడెంట్స్ అసోసియేషన్ (AISA), సీజేపీలు తమ మద్దతుదారులను సమీకరిస్తున్నాయి. శనివారం నగరంలో ప్రదర్శనలు జరగకుండా నిలువరించేందుకు ఢిల్లీ పోలీసులు భారీ బందోబస్తు ఏర్పాటు చేయడంతో పాటు 3,000 మందికి పైగా నిరసనకారులను అదుపులోకి తీసుకున్నారు. వీరిలో అత్యధికులను ఇప్పటికే విడుదల చేసినప్పటికీ, తాజా పిలుపుతో దేశ రాజధానిలో భద్రతా బలగాలు మరోసారి అప్రమత్తమయ్యాయి.