ఎన్నికల బరిలోకి దిగినప్పుడే స్పష్టమైన వ్యూహంతో, సొంతంగా మెజారిటీ సాధించేలా ప్రచారం నిర్వహించడంలో విజయ్ విఫలమయ్యారు. అసెంబ్లీలో తమిళగ వెట్రి కజగం (TVK) 108 స్థానాలతో ఏకైక అతిపెద్ద పార్టీగా అవతరించినప్పటికీ, మ్యాజిక్ ఫిగర్ (118) కు 10 సీట్ల దూరంలో ఆగిపోయింది. ఈ 10 సీట్ల లోటే ఇప్పుడు విజయ్ మెడకు సంకెళ్లు వేసింది. ఒంటరిగా ప్రభుత్వాన్ని నడిపేంత సీట్లు సాధించలేకపోవడమే ఆయన చేసిన మొదటి, అతిపెద్ద పొరపాటుగా రాజకీయ విశ్లేషకులు భావిస్తున్నారు.

మెజారిటీకి సీట్లు తగ్గినప్పుడు చాలా జాగ్రత్తగా అడుగులు వేయాల్సింది పోయి, దొరికిన పార్టీలన్నింటినీ కూటమిలోకి చేర్చుకోవడం విజయ్ చేసిన రెండో పొరపాటని విశ్లేషకులు అంచనా వేస్తున్నారు. మొదట కాంగ్రెస్, కమ్యూనిస్టులు, వీసీకేల మద్దతుతో బలం 116కు చేరినా, మ్యాజిక్ ఫిగర్ కంటే రెండు సీట్లు తక్కువ కావడంతో చివరకు ఐయూఎంఎల్ (IUML) కాళ్ల బేరానికి వెళ్లాల్సి వచ్చింది. కేవలం రెండు సీట్ల కోసం ఒక పార్టీని నెత్తిన పెట్టుకోవడం వల్ల, భవిష్యత్తులో వారు ‘బ్లాక్‌మెయిల్ పాలిటిక్స్’ రుచి చూపించే ప్రమాదాన్ని విజయ్ స్వయంగా కొనితెచ్చుకున్నారు.

రాజకీయాల్లో డిమాండ్ అండ్ సప్లై అనేది చాలా ముఖ్యం. కానీ విజయ్ అవసరానికి మించి మిత్రపక్షాల ముందు లొంగిపోయారనే విమర్శలు వస్తున్నాయి. ఐయూఎంఎల్ జాతీయ అధ్యక్షుడు కేఎం కాదర్ మొహిదీన్ స్వయంగా చెప్తూ.. “తాము కేవలం స్థిరత్వం కోసమే మద్దతు ఇచ్చాం, మంత్రి పదవులు కోరలేదు” అన్నారు. అయినా కూడా అడగకుండానే ఐయూఎంఎల్ ఎమ్మెల్యే ఏఎం షాజహాన్‌కు మంత్రి పదవి ఇవ్వడం, వీసీకే ఒత్తిడికి లొంగి వన్ని అరసుకు బెర్తు ఖరారు చేయడం చూస్తుంటే.. విజయ్ తన సీఎం పవర్‌ను అప్పుడే మిత్రపక్షాల ముందు తాకట్టు పెట్టేశారనే సంకేతాలు ప్రజల్లోకి వెళ్తున్నాయి.

ఒక ప్రభుత్వం కొలువుదీరిన తర్వాత కనీసం ఆరు నెలలైనా పాలనపై, ప్రజలకు ఇచ్చిన హామీలపై దృష్టి పెట్టాలి. కానీ విజయ్ అప్పుడే రెండో విస్తరణకు తెరలేపారు. తొలి విడతలోనే తన పార్టీకి చెందిన 19 మంది, కాంగ్రెస్‌కు చెందిన ఇద్దరితో మంత్రివర్గాన్ని ఏర్పాటు చేసిన విజయ్.. ఆ మరుసటి రోజే రెండో విడత విస్తరణకు సిద్ధమవ్వడం ఆయన రాజకీయ నిస్సహాయతను చూపిస్తోంది. కూటమిలోని భిన్న సిద్ధాంతాలున్న పార్టీలను ఎలా బ్యాలెన్స్ చేయాలో తెలియక, వారు అడిగినప్పుడల్లా విస్తరణలు చేసుకుంటూ పోవడం పెద్ద పరిపాలనా లోపంగా మారుతోంది.

విజయ్ తన మేనిఫెస్టోలో యువతకు, ప్రజలకు ఎన్నో విప్లవాత్మక హామీలు ఇచ్చారు. కానీ ప్రస్తుత సంకీర్ణ పరిస్థితుల్లో వాటిని అమలు చేయడం కష్టంగా మారింది. ఒకవైపు కాంగ్రెస్, మరోవైపు దళిత సామాజిక వర్గ పార్టీ అయిన వీసీకే, ఇంకోవైపు మైనారిటీ పార్టీ అయిన ఐయూఎంఎల్.. ఇలా భిన్నమైన అజెండాలు ఉన్న పార్టీలను సమన్వయం చేసుకోవడానికే విజయ్ తన సమయాన్ని వృధా చేసుకుంటున్నారు. ఫలితంగా స్వతంత్రంగా నిర్ణయాలు తీసుకునే అధికారం ముఖ్యమంత్రి చేతుల్లోంచి జారిపోయి, కూటమి లీడర్ల చేతుల్లోకి వెళ్తోంది. ఈ చిన్న పార్టీలతో పొత్తు పెట్టుకుని విజయ్ తన సొంత టీవీకే (TVK) పార్టీ అస్తిత్వాన్ని, సీఎం కుర్చీ పవర్‌ను పూర్తిగా బలహీనపరుచుకున్నారు.