ఇంటర్నెట్‌లో సెన్సేషన్ సృష్టించిన ‘కాక్‌రోచ్ జనతా పార్టీ’ (CJP) అధికారిక వెబ్‌సైట్ శనివారం నిలిచిపోయింది. కేంద్ర ప్రభుత్వం నియంతృత్వంగా వ్యవహరిస్తూ తమ వెబ్‌సైట్‌ను తొలగించిందని ఆ డిజిటల్ ఉద్యమ వ్యవస్థాపకుడు అభిజీత్ దిప్కే ఆరోపించారు. యువతను లక్ష్యంగా చేసుకుని వ్యంగ్యమైన పోస్టులు, మీమ్స్ ద్వారా వ్యవస్థను విమర్శించే ఈ వినూత్న వేదికకు మిలీనియల్స్, జెన్-జీ (Gen Z) వినియోగదారులలో విపరీతమైన ఆదరణ లభించింది. వెబ్‌సైట్ అందుబాటులో లేకపోయే సమయానికి దాదాపు 10 లక్షల మంది యువకులు ఇందులో సభ్యులుగా చేరారని ఆయన సోషల్ మీడియా వేదికగా వెల్లడించారు. ఇటీవల దేశవ్యాప్తంగా పెను సంచలనం సృష్టించిన నీట్-యూజీ (NEET-UG) పరీక్ష పేపర్ లీకేజీ వివాదంపై కేంద్ర విద్యాశాఖ మంత్రి ధర్మేంద్ర ప్రధాన్ తక్షణమే రాజీనామా చేయాలంటూ ఈ వేదిక ద్వారా ప్రారంభించిన ఆన్‌లైన్ పిటిషన్‌పై కేవలం రెండు రోజుల్లోనే 6 లక్షల మంది సంతకాలు చేశారని దిప్కే పేర్కొన్నారు.