తాజాగా ‘కల్ట్’ చిత్రానికి సంబంధించిన షూటింగ్‌తో పాటు ప్రధాన నిర్మాణ కార్యక్రమాలు పూర్తయ్యాయని చిత్ర బృందం వెల్లడించింది. సినిమాను అక్టోబర్ 30న ప్రపంచవ్యాప్తంగా గ్రాండ్‌గా థియేటర్లలో విడుదల చేసేందుకు మేకర్స్ సన్నాహాలు చేస్తున్నారు. తెలుగు ప్రేక్షకులతో పాటు ఇతర భాషల్లోనూ సినిమాను అందుబాటులోకి తీసుకురావడంతో పాటు విదేశీ భాషల్లో కూడా విడుదల చేసేలా ప్రాజెక్ట్‌ను సిద్ధం చేస్తున్నట్లు తెలుస్తోంది.

ఇప్పటికే విడుదలైన ‘కల్ట్’ టీజర్ సినిమాపై అంచనాలను ఒక్కసారిగా పెంచింది. టీజర్‌లో కనిపించిన విజువల్స్, యాక్షన్ ఎలిమెంట్స్, డార్క్ టోన్ ప్రేక్షకుల దృష్టిని ఆకర్షించాయి. దీంతో సినిమాపై సోషల్ మీడియాలో చర్చ పెరగడంతో పాటు ట్రేడ్ వర్గాల్లోనూ బజ్ ఏర్పడింది. విశ్వక్ సేన్ ఇప్పటివరకు చేసిన సినిమాలకు భిన్నమైన జానర్‌లో ఈ చిత్రం ఉండబోతుందనే ఆసక్తి నెలకొంది.

సినిమాకు మరో ప్రధాన ఆకర్షణ సంగీతం. ‘కేజీఎఫ్’ వంటి పాన్ ఇండియా సినిమాలకు తన మ్యూజిక్‌తో ప్రత్యేకమైన గుర్తింపు తెచ్చుకున్న రవి బసూర్ ‘కల్ట్’కు సంగీతం అందిస్తున్నారు. సినిమా కథకు తగ్గట్టుగా పాటలు, బ్యాక్‌గ్రౌండ్ స్కోర్‌ను రూపొందిస్తున్నట్లు తెలుస్తోంది. ముఖ్యంగా స్లాషర్ జానర్‌కు అవసరమైన టెన్షన్, థ్రిల్‌ను బ్యాక్‌గ్రౌండ్ స్కోర్ మరింత పెంచుతుందని చిత్ర బృందం భావిస్తోంది.

ఇక ‘కల్ట్’ షూటింగ్‌ను రామోజీ ఫిల్మ్‌సిటీలో ప్రత్యేకంగా నిర్మించిన భారీ సెట్‌లో తెరకెక్కించారు. దాదాపు 40 నుంచి 50 రోజుల పాటు కీలకమైన సన్నివేశాలను ఈ సెట్‌లో చిత్రీకరించినట్లు సమాచారం. వందలాది మంది మోడల్స్, నటీనటులతో భారీ స్థాయిలో సన్నివేశాలను రూపొందించినట్లు తెలుస్తోంది. ఈ సన్నివేశాలు సినిమాలో ప్రధాన హైలైట్‌గా నిలిచే అవకాశం ఉందని చిత్ర యూనిట్ చెబుతోంది.

సినిమాకు డైలాగ్స్ విషయంలో కూడా ప్రత్యేకమైన కాంబినేషన్ ఏర్పడింది. ‘పెళ్లి చూపులు’, ‘ఈ నగరానికి ఏమైంది’ వంటి చిత్రాలతో యువతలో ప్రత్యేకమైన క్రేజ్ తెచ్చుకున్న దర్శకుడు, నటుడు తరుణ్ భాస్కర్ ‘కల్ట్’కు మాటలు అందిస్తున్నారు. విశ్వక్ సేన్ విజన్‌కు తరుణ్ భాస్కర్ డైలాగ్స్ తోడవడంతో సినిమాలో యూత్‌కు కనెక్ట్ అయ్యే కంటెంట్ మరింత బలంగా ఉంటుందని అంచనా.

టెక్నికల్ విభాగంలోనూ ‘కల్ట్’లో ప్రత్యేకమైన టీమ్ పనిచేస్తోంది. ‘యానిమల్’ వంటి భారీ చిత్రాలకు సౌండ్ డిజైన్ చేసిన సచిన్ ఈ సినిమాకు కూడా పనిచేస్తున్నారు. దీంతో విజువల్స్‌తో పాటు సౌండ్ డిజైన్ కూడా ప్రేక్షకులకు కొత్త అనుభూతిని అందించేలా ఉంటుందని చిత్ర బృందం చెబుతోంది.

తారక్ సినిమాస్ పతాకంపై సందీప్ కాకరాల భారీ బడ్జెట్‌తో ఈ సినిమాను నిర్మిస్తున్నారు. ఖర్చుకు ఏమాత్రం వెనకాడకుండా అత్యాధునిక సాంకేతిక పరిజ్ఞానంతో ‘కల్ట్’ను తెరకెక్కిస్తున్నట్లు సమాచారం. ప్రస్తుతం అన్ని కార్యక్రమాలు పూర్తి కావడంతో అక్టోబర్ 30న థియేటర్లలోకి రాబోతున్న ఈ గ్లోబల్ స్లాషర్ ఫిల్మ్‌పై ఆసక్తి మరింత పెరిగింది.