అమెరికా రాజ్యాంగంలోని 14వ సవరణ ప్రకారం… అమెరికా గడ్డపై జన్మించిన ఎవరికైనా పౌరసత్వం మంజూరు చేయడం అనేది గత 160 ఏళ్లుగా సాగుతున్న ఆచారం. ప్రస్తుతం సాంకేతికత, ఇంజనీరింగ్, హెల్త్‌కేర్, ఫైనాన్స్ రంగాలలో పెద్ద సంఖ్యలో భారతీయ నిపుణులు H-1B వీసాలపై అమెరికాలో పని చేస్తున్నారు. 14వ రాజ్యాంగ సవరణ యొక్క ప్రస్తుత నిబంధనల ప్రకారం… తల్లిదండ్రులు H-1B ఉద్యోగులైనా, విద్యార్థులైనా, తాత్కాలిక వీసా హోల్డర్లైనా, గ్రీన్ కార్డ్ హోల్డర్లైనా లేదా నాన్-యూఎస్ సిటిజన్లైనా సరే, అమెరికాలో జన్మించిన బిడ్డను సాధారణంగా అమెరికా పౌరుడిగానే పరిగణిస్తారు.

అమెరికాలో అక్రమంగా నివసిస్తున్న వారు లేదా H-1B ఉద్యోగులతో సహా తాత్కాలిక వీసాలపై ఉన్నవారికి పుట్టే పిల్లలకు లభించే ‘ఆటోమేటిక్ అమెరికా పౌరసత్వాన్ని’ రద్దు చేయాలని ట్రంప్ తన ఎగ్జిక్యూటివ్ ఆర్డర్ ద్వారా ప్రయత్నించారు. అయితే, అధ్యక్షుడి ఉత్తర్వుల ద్వారా ఈ హక్కును నియంత్రించాలనుకున్న ప్రయత్నాలకు సుప్రీంకోర్టు తీర్పుతో గట్టి ఎదురుదెబ్బ తగిలింది.

అయితే, పిల్లలకు వచ్చే పౌరసత్వం తల్లిదండ్రులకు వర్తించదు. H-1B లేదా ఇతర తాత్కాలిక వీసాలపై ఉన్న తల్లిదండ్రులు తమ చట్టపరమైన వలస హోదాను (Immigration Status) స్వతంత్రంగా కొనసాగించుకోవాల్సి ఉంటుంది. అమెరికా వలస చట్టాల ప్రకారం… అమెరికా పౌరసత్వం ఉన్న బిడ్డకు 21 ఏళ్లు నిండే వరకు, ఆ బిడ్డ తన తల్లిదండ్రులకు శాశ్వత నివాసం (గ్రీన్ కార్డ్) కోసం స్పాన్సర్ చేయడానికి వీలుండదు.