న్యూజెర్సీ వేదికగా జరిగిన ఈ ఉత్కంఠభరిత పోరులో మ్యాచ్ ప్రారంభమైన 109 సెకన్లకే జర్మనీ ఖాతా తెరిచింది. ఫ్లోరియన్ విర్ట్జ్ అందించిన అద్భుతమైన పాస్‌ను లెరాయ్ సనే లో-ఫినిషింగ్‌తో గోల్‌గా మలిచాడు. అయితే ఈ గోల్ పట్ల ఈక్వడార్ ఆటగాళ్లు తీవ్ర నిరసన వ్యక్తం చేశారు. బిల్డ్-అప్ సమయంలో జర్మనీ ఆటగాడు అలెక్సాండర్ పావ్లోవిచ్, ఈక్వడార్‌కు చెందిన పెడ్రో విటేపై ‘హై ఫుట్’ ఫౌల్ చేశాడని, విఎఆర్ (VAR) దీన్ని తిరస్కరించడం తగదని వారు వాదించారు. అయినప్పటికీ రిఫరీ గోల్‌ను అనుమతించడంతో జర్మనీ 1-0తో ముందంజ వేసింది.

గోల్ లీడ్ లభించినప్పటికీ జర్మనీ ఆ ఆనందాన్ని ఎక్కువసేపు నిలుపుకోలేకపోయింది. కేవలం 7 నిమిషాల వ్యవధిలోనే (9వ నిమిషంలో) ఈక్వెడార్ తరఫున తొలిసారి స్టార్టింగ్ లైనప్‌లో బరిలోకి దిగిన మిడ్‌ఫీల్డర్ నిల్సన్ అంగులో మైదానాన్ని హోరెత్తించాడు. పెడ్రో విటే అందించిన పాస్‌ను అందుకుని, జర్మనీ రక్షణ శ్రేణిని చేధిస్తూ బాక్స్ వెలుపల నుండి అంగులో కొట్టిన క్లాస్ షాట్ నేరుగా లెజెండరీ గోల్‌కీపర్ మాన్యువల్ నూయర్ కాళ్ల సందు గుండా నెట్‌లోకి దూసుకెళ్లింది. ఈ టోర్నీలో 40 ప్రయత్నాల తర్వాత ఈక్వెడార్ నమోదు చేసిన మొదటి గోల్ ఇదే కావడం విశేషం.

సెకండ్ హాఫ్ ప్రారంభంలోనే జర్మనీకి లభించిన పెనాల్టీ నిర్ణయాన్ని విఎఆర్ (VAR) రివ్యూ ద్వారా రిఫరీ టోరి పెన్సో రద్దు చేశారు. కాయ్ హావెర్ట్జ్‌పై ఫౌల్ జరగడానికి ముందే లెరాయ్ సనే, పెడ్రో విటేపై ఫౌల్ చేసినట్లు రిప్లేలో తేలడంతో ఈక్వడార్ ఊపిరి పీల్చుకుంది.

ఈ విజయంతో ఈక్వడార్ గ్రూప్ ‘ఇ’ లో 4 పాయింట్లతో మూడో స్థానంలో నిలిచినప్పటికీ, టోర్నీలోనే అత్యుత్తమ ప్రదర్శన చేసిన టాప్-8 ‘థర్డ్-ప్లేస్డ్’ జట్లలో ఒకటిగా నాకౌట్ బెర్త్‌ను ఖరారు చేసుకుంది. ఈక్వడార్ చరిత్రలో ప్రపంచకప్‌లో నాకౌట్ దశకు చేరుకోవడం ఇది కేవలం రెండోసారి మాత్రమే. మరోవైపు, ఓటమి పాలైనప్పటికీ మెరుగైన గోల్ డిఫరెన్స్ కారణంగా జర్మనీ గ్రూప్ టాపర్‌గానే ముగించింది.