“నేను మర్యాదపూర్వకంగానే చాలాసార్లు వద్దని చెప్పాను. అపరిచితులను నా ఫ్లాట్‌లోకి రానివ్వనని స్పష్టంగా చెప్పాను. అత్యవసరమైతే పక్కనున్న ఇరుగుపొరుగు వారిని (పురుషులను) అడగమని సూచించాను. అయినా నా మాట వినకుండా, అతను తన చెప్పులు విడిచి నా అనుమతి లేకుండా బలవంతంగా నా ఇంట్లోకి చొరబడ్డాడు,” అని బాధితురాలు తన పోస్ట్‌లో రాసుకొచ్చింది.

వాష్‌రూమ్ వాడిన తర్వాత బయటకు వచ్చిన డెలివరీ ఏజెంట్, తన పట్ల అసభ్యంగా ప్రవర్తించాడని (తన ప్రైవేట్ భాగాలను ప్రదర్శించాడని) ఆమె ఆరోపించింది.

“వాష్‌రూమ్ నుంచి బయటకు వచ్చాక అతను నా ముందు అసభ్యంగా ప్రవర్తించాడు. నేను షాక్‌కి గురయ్యాను, తీవ్ర అవమానంగా భావించాను. నా సొంత ఇంట్లోనే నాకు భద్రత లేదనిపించింది. ఒక మహిళ ‘వద్దు’ అని చెబితే, అక్కడితో ఆ సంభాషణ ఆగిపోవాలి. ఆమె మాటను బేఖాతరు చేస్తూ, ఇంట్లోకి బలవంతంగా చొరబడే హక్కు ఎవరికీ లేదు,” అని ఆమె ఆవేదన వ్యక్తం చేసింది.

ఆ సమయంలో తాను చాలా భయపడ్డానని, తన భద్రత కోసం ఫోన్ కెమెరాను ఆన్ చేసి ఉంచానని ఆమె తెలిపింది. ఒకవేళ పరిస్థితి చేజారితే బయటకు పరిగెత్తి సహాయం అడగడానికి వీలుగా, ప్రధాన ద్వారం తెరిచి ఉంచి గుమ్మం దగ్గరే నిలబడ్డానని వివరించింది. రోజూ మహిళలపై జరుగుతున్న అఘాయిత్యాల వార్తలు వింటున్న తనకు, ఈ ఘటనతో మానసిక క్షోభకు గురయ్యానని పేర్కొంది.

ఆమె ఫిర్యాదు ఆధారంగా, భారతీయ న్యాయ సంహిత (BNS) లోని సెక్షన్లు 75, 79 మరియు 329(2) కింద పోలీసులు కేసు నమోదు చేశారు. నిందితుడిని అరెస్టు చేసి చట్టపరమైన చర్యలు ప్రారంభించారు. తదుపరి విచారణ కొనసాగుతోంది.

డెలివరీ ఏజెంట్‌ను తొలగించిన ఫ్లిప్‌కార్ట్

ఈ ఘటనపై తీవ్ర దిగ్భ్రాంతి వ్యక్తం చేసిన ఫ్లిప్‌కార్ట్ సంస్థ, సదరు డెలివరీ ఏజెంట్‌ను విధుల నుండి తక్షణమే తొలగించినట్లు ప్రకటించింది. కస్టమర్‌కు తమ పూర్తి మద్దతు ఉంటుందని తెలిపింది.

తమ డెలివరీ పార్టనర్లందరికీ విధుల్లోకి తీసుకునే ముందు బ్యాక్‌గ్రౌండ్ వెరిఫికేషన్ (నేపథ్య విచారణ) మరియు తప్పనిసరి శిక్షణ ఉంటుందని కంపెనీ స్పష్టం చేసింది. “ఇలాంటి ఘటనలు చాలా అరుదుగా జరుగుతాయి, అయితే ఒక్క ఘటన జరిగినప్పటికీ అది ఆమోదయోగ్యం కాదు. కస్టమర్ భద్రతా విధానాలను మరింత బలోపేతం చేయడానికి అదనపు చర్యలు ఏమైనా తీసుకోవాలా అనే దానిపై సమగ్రంగా సమీక్షిస్తున్నాము” అని ఫ్లిప్‌కార్ట్ పేర్కొంది.