నేటి సమాజంలో ఆధారాల్లేని పుకార్లు (గాసిప్స్) ఒక యువతి జీవితాన్ని, ఆమె కుటుంబ పరువును ఎలా ఛిద్రం చేస్తాయనే సున్నితమైన అంశం చుట్టూ ఈ కథ తిరుగుతుంది. ప్రకాశం (రవి వర్మ) తన చెల్లెలిని రమేష్ (విజయ్ ఆదిరాజు)కు ఇచ్చి వివాహం చేస్తాడు. కానీ, దురదృష్టవశాత్తూ ఆమె ప్రసవ సమయంలో మరణిస్తుంది. ఆ తర్వాత, మేనకోడలు అజంతా (రాశి సింగ్)ను పెద్ద కూతురిలా ప్రాణంగా చూసుకుంటాడు ప్రకాశం. మరోవైపు తండ్రి రమేష్.. తన కూతురిని సమాజానికి ఆదర్శంగా నిలిచేలా, అత్యంత క్రమశిక్షణతో పెంచుతానని శపథం చేస్తాడు.

టాలీవుడ్‌లో ప్రస్తుతం కంటెంట్ బేస్డ్ సినిమాలకు, మెసేజ్ ఓరియెంటెడ్ కథలకు మంచి ఆదరణ దక్కుతున్న నేపథ్యంలో, ‘గాసిప్’ చిత్రం కూడా అదే కోవలో ప్రేక్షకులను ఆకట్టుకుంటోంది. అజంతా పాత్రలో రాశి సింగ్ నటన సినిమాకు హైలైట్‌గా నిలిచింది. ఒక చిన్న పుకారు వల్ల మానసిక క్షోభకు గురయ్యే యువతిగా ఆమె తన కెరీర్‌లోనే బెస్ట్ పెర్ఫార్మెన్స్ ఇచ్చారు. రవి వర్మ, విజయ్ ఆదిరాజు తమ పాత్రల పరిధి మేర అద్భుతంగా నటించి భావోద్వేగాలను పండించారు. కమెడియన్ 30 ఇయర్స్ పృథ్వీ తనదైన శైలిలో నవ్విస్తూనే, మంచి సందేశాన్ని అందించారు.

మహిళల వ్యక్తిగత జీవితాలపై గాసిప్స్ సృష్టించడం ఎంత ప్రమాదకరమో, అది వారి జీవితాలపై ఎలాంటి ప్రభావాన్ని చూపుతుందో కళ్లకు కట్టినట్లు చూపించిన చిత్రం ‘గాసిప్’. భావోద్వేగాలు, బలమైన సామాజిక సందేశం ఉన్న ఈ చిత్రాన్ని కుటుంబ సమేతంగా చూడొచ్చు.