కేంద్ర ప్రభుత్వం ఔషధ నియమాల్లో చేసిన సవరణల ప్రకారం, వివిధ రకాల ఔషధ సిరప్‌లను కొనుగోలు చేయడానికి నమోదిత వైద్యుడు జారీ చేసిన ప్రిస్క్రిప్షన్ తప్పనిసరి. ముఖ్యంగా కఫ్ సిరప్‌లను ఓటీసీ విక్రయాల జాబితా నుంచి తొలగిస్తూ కఠిన నియంత్రణలు అమలు చేయనుంది. ఇప్పటి వరకు కొన్ని పట్టణ ప్రాంతాల్లో అమలులో ఉన్న ఈ విధానం ఇకపై గ్రామీణ ప్రాంతాల్లో కూడా వర్తించనుంది.

ఆరోగ్య మంత్రిత్వ శాఖ విడుదల చేసిన నోటిఫికేషన్ ప్రకారం, ఔషధాల దుర్వినియోగాన్ని అరికట్టడం, ప్రజల ఆరోగ్య భద్రతను మెరుగుపరచడం లక్ష్యంగా ఈ నిర్ణయం తీసుకున్నారు. కొత్త నిబంధనల ప్రకారం, లైసెన్స్ పొందిన మెడికల్ షాపులు లేదా ఫార్మసీల ద్వారానే సిరప్‌ల విక్రయాలు జరగాలి.

ఇక షెడ్యూల్-K (Schedule K)లో ఉన్న ప్రత్యేక మినహాయింపుల జాబితా నుంచి ‘సిరప్’ అనే పదాన్ని ప్రభుత్వం తొలగించింది. గతంలో 1,000 మందికంటే తక్కువ జనాభా ఉన్న చిన్న గ్రామాల్లో కొన్ని లైసెన్స్ నిబంధనల నుంచి మినహాయింపు ఉండేది. ఇప్పుడు ఆ మినహాయింపులు కూడా రద్దయ్యాయి. దీంతో గ్రామం నుంచి నగరం వరకు ఒకే విధమైన నిబంధనలు అమల్లోకి వచ్చాయి.

ఓటీసీ (OTC) విక్రయాలపై పరిమితులు అమలు.

లైసెన్స్ పొందిన మెడికల్ షాపుల ద్వారానే విక్రయాలు.

చిన్న గ్రామాల్లో కూడా ఇదే నిబంధనలు వర్తింపు.

ఔషధాల దుర్వినియోగాన్ని అరికట్టడం, ప్రజారోగ్య భద్రతను పెంపొందించడం ప్రధాన లక్ష్యం.

కఫ్ సిరప్ తయారీదారులు, పంపిణీదారులు, ఔషధ విక్రేతలు అన్ని నియంత్రణ నిబంధనలను కచ్చితంగా పాటించాలని కేంద్ర ఆరోగ్య మంత్రిత్వ శాఖ సూచించింది.