పోలీసుల వివరాల ప్రకారం.. మల్కాజ్‌గిరి మారుతీనగర్‌కు చెందిన అరుణ్‌కుమార్‌ రియల్‌ ఎస్టేట్‌ వ్యాపారం చేస్తున్నాడు. అతనికి మొదటి భార్య ద్వారా ఇద్దరు పిల్లలు ఉన్నారు. కుటుంబ విభేదాలు, వ్యక్తిగత కారణాల నేపథ్యంలో మొదటి భార్యతో విడిపోయిన అరుణ్‌, అనంతరం ఆమె సోదరి ఉషారాణిని ప్రేమించి వివాహం చేసుకున్నాడు. గత ఐదేళ్లుగా ఇద్దరూ కలిసి జీవిస్తున్నారు.

అయితే కొంతకాలంగా ఉషారాణి ఇతరులతో సన్నిహితంగా ఉంటోందని, ఫోన్‌లో చాటింగ్ చేస్తోందని అరుణ్‌కుమార్‌ అనుమానం పెంచుకున్నట్లు సమాచారం. ఈ అనుమానాలే క్రమంగా దంపతుల మధ్య గొడవలకు దారితీశాయి. తరచూ వివాదాలు చోటుచేసుకోవడంతో ఉషారాణి భర్తకు దూరంగా ఉంటూ వస్తోంది. దీంతో భార్యపై తీవ్ర పగ పెంచుకున్న అరుణ్‌కుమార్‌ ఆమెను అంతం చేయాలని నిర్ణయించుకున్నట్లు దర్యాప్తులో తేలుతోంది.

ఈ ఏడాది మార్చి నెలలోనే బిహార్‌ నుంచి అక్రమంగా దేశవాళీ తుపాకీ, బుల్లెట్లు తెప్పించుకున్న అరుణ్‌.. హత్యకు ముందస్తు ప్రణాళిక రూపొందించాడు. తుపాకీ వినియోగంపై సాధన కూడా చేసినట్లు పోలీసులు గుర్తించారు. అయితే అతడి కదలికలపై సమాచారం అందుకున్న చార్మినార్‌ టాస్క్‌ఫోర్స్‌ పోలీసులు అంబర్‌పేట ప్రాంతంలో వాహన తనిఖీల సందర్భంగా అతడిని పట్టుకుని తుపాకీని స్వాధీనం చేసుకున్నారు. ఆయుధ చట్టం కింద కేసు నమోదు చేసి అరెస్టు చేశారు. దీంతో అప్పట్లో హత్యాయత్నం విఫలమైంది.

అయితే జైలు శిక్ష, కేసులు కూడా అరుణ్‌కుమార్‌ ఆలోచనలను మార్చలేకపోయాయి. బెయిల్‌పై బయటకు వచ్చిన తర్వాత మళ్లీ తన పాత ప్రణాళికను అమలు చేయడానికి సిద్ధమయ్యాడు. పాతబస్తీ ప్రాంతానికి చెందిన స్నేహితుల ద్వారా మరో తుపాకీని సమకూర్చుకున్నట్లు పోలీసులు అనుమానిస్తున్నారు.

బుధవారం తెల్లవారుజామున మాట్లాడుకుందామని చెప్పి ఉషారాణిని ఇంటి బయటకు పిలిచిన అరుణ్‌, తనతో వచ్చిన మరో వ్యక్తి సహాయంతో ఆమెపై కాల్పులు జరిపాడు. వరుసగా మూడు రౌండ్లలో కాల్పులు జరపడంతో బుల్లెట్లు తగిలిన ఉషారాణి అక్కడికక్కడే కుప్పకూలి మృతి చెందినట్లు సమాచారం. కాల్పుల శబ్దం విన్న స్థానికులు భయాందోళనకు గురై వెంటనే పోలీసులకు సమాచారం అందించారు.

సంఘటనా స్థలానికి చేరుకున్న పోలీసులు ఆధారాలు సేకరించి మృతదేహాన్ని పోస్టుమార్టం నిమిత్తం సికింద్రాబాద్‌ గాంధీ ఆస్పత్రికి తరలించారు. నిందితులు ఘటన అనంతరం పరారవడంతో ప్రత్యేక బృందాలను ఏర్పాటు చేసి గాలింపు చర్యలు చేపట్టారు. హత్యకు ఉపయోగించిన తుపాకీ ఎక్కడి నుంచి వచ్చింది? ఎవరు అందించారు? అక్రమ ఆయుధాల నెట్‌వర్క్‌తో అరుణ్‌కు ఉన్న సంబంధాలు ఏమిటి? అనే కోణాల్లో పోలీసులు లోతుగా దర్యాప్తు చేస్తున్నారు.

మూడు నెలల క్రితం పోలీసులకు చిక్కి కూడా తప్పించుకున్న నిందితుడు చివరకు తన పథకాన్ని అమలు చేయడం ఈ కేసులో అత్యంత ఆందోళనకర అంశంగా మారింది. ఒకసారి హత్యకు ప్రయత్నించిన వ్యక్తిపై మరింత కఠిన నిఘా అవసరమా అనే ప్రశ్నలు కూడా ఇప్పుడు తలెత్తుతున్నాయి. ప్రస్తుతం ఈ కేసు నగర వ్యాప్తంగా చర్చనీయాంశంగా మారగా, నిందితుల అరెస్టు కోసం పోలీసులు ముమ్మరంగా గాలిస్తున్నారు.