లార్సెన్ చాలా క్రూరంగా సోహైల్ ఒంటిపై దాడి చేస్తుండటంతో పక్కనే ఉన్న జ్యువెలరీ షాప్ ఉద్యోగిని లూనా నూనెజ్ స్పందించారు. భయానక వాతావరణం మధ్య ఆమె నిందితుడిపైకి కుర్చీలు, షూస్ విసిరారు. ఆపై మాల్లోని మరికొందరు భక్తులు, స్థానికులు ప్రాణాలకు తెగించి నిందితుడిని పట్టుకుని కిందకు పడేసి బంధించారు. పోలీసులు వచ్చేసరికే నిందితుడిని స్థానికులు లొంగదీసుకున్నారు. ఈ దాడిలో సోహైల్ శరీరమంతటా తీవ్రమైన గాయాలై, రక్తం భారీగా కారిపోయింది. ప్రస్తుతం అతను ఆసుపత్రిలో అత్యంత విషమ పరిస్థితిలో చికిత్స పొందుతున్నాడు.

నిందితుడు లార్సెన్‌ను పోలీసులు అరెస్ట్ చేసి సాల్ట్ లేక్ కౌంటీ జైలుకు తరలించారు. అతనిపై హత్యాయత్నం కేసు నమోదు చేశారు. లార్సెన్ తీవ్రమైన హింసాత్మక ఆలోచనలు, సిద్ధాంతాలు కలిగి ఉన్నాడని, సమాజానికి అతను చాలా ప్రమాదకరమైన వ్యక్తని పోలీసులు కోర్టు అఫిడవిట్‌లో పేర్కొన్నారు. నిందితుడు గతంలో 2022లో కూడా ఒక హింసాత్మక ఘటనలో జైలుకు వెళ్లి, ఇటీవల జనవరి 2025లోనే విడుదలయ్యాడు.

బాధితుడు సోహైల్‌కు భార్య, ఇద్దరు చిన్న పిల్లలు ఉన్నారు. అతడు హైదరాబాద్‌కు చెందినవాడని సమాచారం. ఆ కుటుంబంలో సంపాదించే ఏకైక వ్యక్తి సోహైల్ మాత్రమే. ప్రస్తుతం అతనికి ఎలాంటి హెల్త్ ఇన్సూరెన్స్ లేకపోవడం, వరుస సర్జరీలు జరుగుతుండటంతో చికిత్స ఖర్చుల నిమిత్తం స్నేహితులు ఆన్‌లైన్‌లో ‘గోఫండ్‌మీ’ (GoFundMe) ద్వారా విరాళాలు సేకరిస్తున్నారు.

ఈ దాడిని కౌన్సిల్ ఆన్ అమెరికన్-ఇస్లామిక్ రిలేషన్స్ (CAIR) తో పాటు పలు ముస్లిం హక్కుల సంఘాలు తీవ్రంగా ఖండించాయి. ఉటా ఇస్లామిక్ సెంటర్ ఇమామ్ షుఐబ్ దిన్ మాట్లాడుతూ, “పైకి ఇది ఒక వ్యక్తిపై జరిగిన దాడిలా కనిపించినా, ఇది మొత్తం సమాజంపై జరిగిన దాడి. దీనివల్ల ఇక్కడున్న మైనారిటీలంతా అభద్రతాభావానికి గురవుతున్నారు” అని ఆవేదన వ్యక్తం చేశారు. అమెరికాలో పెరుగుతున్న ఇలాంటి ద్వేషపూరిత దాడులపై పౌర హక్కుల సంఘాలు ఆందోళన వ్యక్తం చేస్తున్నాయి.